Բուդապեշտում անցկացված Եվրոպայի հունահռոմեական ըմբշամարտի առաջնությունում իր համար անսովոր, ավելի բարձր ՝ 77 կգ քաշային կարգում հանդես եկավ երևանցի Մալխաս Ամոյանը: Նորամուտը հաջողությամբ  պսակվեց:

Հետաքրքիր էր  նրա  հինգերորդ  << բեմելը  >> :   Մրցագորգ բարձրանալուց, նախավերջին աստիճանից, Մալխասը միանգամից  ցատկեց ասպարեզ:

Հեռուստադիտողիս համար ինչ որ խորհուդ կար մեր ըմբիշի գործողությունում: Կանխազգացինք, որ նա կուրախացնի, որ նրա ցատկը հաղթական է լինելու: Այդպես էլ եղավ:

Հայաստանի շնորհալի վարպետը գոտեմարտի ամբողջ ընթացքում << աշխատեց  գլխով >> , ասել է թե՝  խելացի, մտածված էին նրա բոլոր ձեռնարկումները:  Հակառակ պարագայում, մրցակիցների համեմատ քաշով ավելի թեթև Մալխասը, երևի թե չկարողանար հաղթահարել հինգ արգելքներ, որոնք յուրատեսակ էին և բարդ:

Նկատի ունենք հատկապես քառորդ եզրափակիչում աշխարհի փոխչեմպիոն, Եվրոպայի չեմպիոն, ադրբեջանցի Սանան Սուլեյմանովի և եզրափակիչում, Եվրոպայի մինչև 23 տարեկանների ոսկե դափնեկիր,  թուրք Յունուս Էմրե Բաշարի հետ անցկացրած գոտեմարտերը, որոնք ավարտվեցին երևանցու առավելությամբ, համապատասխանաբար 6 : 5  և 4 : 3 հաշիվներով:

Գրանցված միավորները հուշում են, որ նշած մրցակիցները Մալխասի դեմ ,   <<  ատամները սրած >>  են մտել ասպարեզ: Մրցել են ու . . . տապալվել:

Այս պարագայում  արժե նշել , մեր չեմպիոնի տոնած  մյուս երեք հանդիպումներում գրանցված հաշիվները. միևնույն ՝  9 : 0՝  լիտվացու և շվեդի ու 5 : 1 ՝ սլովակի հետ գոտեմարտերում:

Դիտարժան էր  Մալխասի ժեստը Բաշարի հետ հանդիպման վերջնամասում: Մրցագորգի վրա հեկեկացող պարտված մրցակցին մոտեցավ մեր պատվիրակը, ձեռքը մեկնելով բարձրացրեց նրան ՝ հավատարիմ մնալով օլիմպիական սկզբունքին. հարգիր քեզ պարտված  մրցակցիդ , որի շնորհիվ դու չեմպիոն հռչակվեցիր:

Աշխարհի գործող չեմպիոն Մալխաս Ամոյանը դարձավ նաև  Եվրոպայի ոսկե մեդալակիր և նրա հաղթանակի պատվին մարզադահլիճի կամարների ներքո, Հայաստանի օրհներգի հնչյունների ուղեկցությամբ, վեր խոյացավ մեր եռագույնը:

Կարծում ենք , որ վաստակավոր մարզիչ  Համլետ Հովհաննիսյանի չեմպիոն աշակերտի առավել խոսուն հաղթանակները դեռ առջևում են:

Հայ մարզասերներին շատ ուրախացրին նաև  պատվո պատվանդան բարձրացած մեր բրոնզե մեդալակիրները.  Ռուդիկ Մկրտչյանը / 55 կգ /, Գևորգ Ղարիբյանը / 60 կգ / և Սլավիկ Գալստյանը / 67 կգ/:  

Բուդապեշտին մեր հավաքականը հրաժեշտ տվեց լավ  տրամադրությամբ: Նվաճած չորս մեդալները վկայում են գլխավոր մարզիչ Էդվարդ Սահակյանի ղեկավարած մարզչական  խմբի և ըմբիշների անձնական մարզիչների հուսալի աշխատանքի մասին: