Ճապոնիայի իշխանություններն «անգործ» են թողել տոմսեր վերավաճառողներին
Ճապոնիայում ուժի մեջ է մտել մարզական իրադարձությունների եւ համերգների տոմսերը վերավաճառելն արգելող օրենք: Օրինախախտները կտուգանվեն 9.5 հազար դոլար եւ կարող են դատապարտվել մինչեւ մեկ տարվա ազատազրկման:
Բոլոր տոմսերը պաշտպանված կլինեն QR ծածկագրերով եւ գնորդի տվյալներով:
Տոկիոյում կայանալիք 32-րդ ամառային Օլիմպիական խաղերի կազմակերպիչները մարզական կենտրոններ մուտք գործելիս պարտադիր կստուգեն երկրպագուների ինքնությունը:
Օրենքը չի ազդի Տոկիո-2020-ի հրավիրատոմսերի եւ անվճար տոմսերի վրա: Եթե երկրպագուն ինչ-ինչ պատճառներով չկարողանա ներկա լինել մրցմանը, ապա նա հնարավորություն կունենա վաճառել իր տոմսը Տոկիո-2020-ի կազմկոմիտեի կայքում:
Հիշեցնենք, որ Օլիմպիական խաղերը Ճապոնիայի մայրաքաղաք Տոկիոյում կանցկացվեն 2020թ. հուլիսի 24-ից օգոստոսի 9-ը: Հանդես կգան 12 հազարից ավելի մարզիկներ` 33 մարզաձեւերում:
