Եվրոպայի համալիր առաջնությունը  կկայանա Մյունխենում,  2022թ.  օգոստոսին: Մեկնարկից մեկ տարի առաջ, հետհաշվարկով , կազմակերպիչները տոնակատարություններ են անցկացրել: Ցուցադրական ելույթներով հանդես են եկել գերմանացի հայտնի մարզիկները, մշակույթի ներկայացուցիչները:

Միջոցառումը  Գերմանիայի ամենամեծ մարզական իրադարձությունը կհանդիսանա վերջին կես դարի ընթացքում և  1972թ.  Մյունխենում կայացած ամառային 20 –րդ  օլիմպիական խաղերի տարեդարձի տոնակատարությունների գագաթնակետը կդառնա:  Ի դեպ, հայերիս համար Մյունխենի օլիմպիական խաղերը  նշանակալից են մեր մարզիկների կատարած մեդալների առատ հունձքով: Չեմպիոնի կոչումով Երևան վերադարձավ սկավառականետորդուհի Ֆաինա Մելնիկը: Փոխչեմպիոնի արծաթե մեդալին արժանացավ երևանցի մարմնամարզիկ Էդվարդ Միքայելյանը: Նրանց համաքաղաքացիներ, ֆուտբոլիստներ Արկադի Անդրեասյանը, Հովհաննես Զանազանյանը և ջրացատկորդ Դավիթ Համաբարձումյանը կանգնեցին պատվո պատվանդանի  << բրոնզե աստիճանին >>  :

Անդրադառնալով  2022 -ին կայանալիք համալիր խաղերին , ասենք , որ մրցումների  զգալի մասը կանցկացվի հենց  1972-ի  արդիականացված մարզահամալիրներում , որտեղ հաշվի են  առնվել  ժամանակակից պահանջները: 

Եկող տարի նախատեսված առաջնության 11 օրերի  ընթացքում շուրջ  4800 մարզիկ – մարզուհիներ ինը մարզաձեւերում կպայքարեն մեդալների 176 հավաքածուի համար: 

Համալիր խաղերի ծրագրում ընդգրկված են աթլետիկա, լողափնյա վոլեյբոլ, կանոէ սպրինտ, հեծանվավազք, մարմնամարզություն, թիավարություն, ժայռամագլցում, սեղանի թենիս և եռամարտ մարզաձևերը:

Եվրոպայի առաջին համալիր  առաջնությունը տեղի է ունեցել  2018թ.  Գլազգոյում: