ԴԵՊԻ ԵՎՐՈՊԱԿԱՆ ՍՏՈՒԳԱՏԵՍՆԵՐ

14:17 - 20 Ապր, 2022

Հայաստանի կանանց ծանրամարտի հավաքականը  սովորաբար  լավ մրցելույթներ է ունենում միջազգային պաշտոնական մրցումներում:  Հաջողության ակնկալիքով  է թիմը  նախապատրաստվում  եվրոպական ստուգատեսներին:

Գլխավոր մարզիչ, վաստակավոր մարզիչ Արտաշես  Ներսիսյանը  ասաց, որ ընթացիկ մրցաշրջանում մարզուհիները ուսումնամարզական առաջին հավաքը անցկացրել են Ծաղկաձորում:  Այնտեղ շեշտը հիմնականում դրվել   է մարզվողների ընդհանուր ֆիզպատրաստականությունը բարելավելու վրա: Պարապողներն  այժմ   Աբովյանում են զարգացնում իրենց ունակությունները:  Հասկանալի է, որ յուրաքանչյուր մոտեցման ժամանակ գլխավոր մարզիչը և իր օգնական Տարոն Թովմասյանը ուշադիր են նաև հատուկ ֆիզպատրաստականության որակների բարելավմանը:

Ապրիլի 30 –ին  ծանրորդուհիների համերաշխ համակազմը կավարտի  այս փուլը:  Նույն օրը Միլենա Խաչատրյանը  / 76 կգ / տղաների թիմի հետ կմեկնի Հունաստան,որպեսզի մասնակցի Եվրոպայի երիտասարդական առաջնությանը: Մյուսները  մարզումները կշարունակեն մայրաքաղաքի Օլիմպավանում: Այստեղ արդեն  մարզվողները և մարզիչները առավել ուշադիր կլինեն: Պետք է հնարավորինս զերծ մնալ  վնասվածքներից, լուծում տալ  անձնական քաշի կարգավորմանը,   ավելացնել  ծանրաձողի  կիլոգրամները և անհրաժեշտ մարզավիճակով ու բարձր տրամադրությամբ  մեկնել  Ալբանիա , որտեղ մայիսի 26 –ին կսկսվի Եվրոպայի առաջնությունը:

Նախնական հայտով  նախատեսված է  մրցումների ուղեկցել  երեք հոգու : Նրանք են ՝ Իզաբելա Յայլյանը / 55 կգ /,  Տաթև Հակոբյանը / 81 կգ / և Հռիփսիմե Խուրշուդյանը / 87կգ /:  

 

 

Այլ նորություններ