Եվրոպայի բռնցքամարտի երևանյան առաջնության երկօրյա պայքարում Հայաստանի հավաքականից մրցել են չորս մարզիկներ: Նրանցից երկուսը ձախողվել են, երկուսը՝ հաղթել:

Երկրորդ փուլ մտած Վախթանգ Հարությունյանին / 75 կգ / երեկ միացավ Համբարձում Հակոբյանը / 80 կգ /: Նրա մրցակիցն էր մոլդովացի Դմիտրի Կոսցյուկը: Վերջինը բարձրահասակ էր և ջանում էր երևանցուն պահել տարածության վրա ու անհրաժեշտ միավորներ վաստակել: Այդ անելը նրան հաջողվեց առաջին ռաունդում: Հաջորդ երկու մրցակեսերում նախաձեռնությունը խլեց տանտերը: Ավելին,  հասակով զիջող Համբարձումին  շարունակական գրոհների արդյունքում հաջողվում էր մոտենալ և դիպուկ հարվածներ հասցնել հյուրին: Մեր բռնցքամարտիկը երբեմն ուժգին հարվածներով <<  խոցում  >>  էր  Կոսցյուկի որովայնը: Մոլդովացին ուժասպառվեց, չդիմացավ լարվածությանը, կորցրեց պաշտպանունակությունը,  դեմքին ծանր հարվածներ ստացավ, հայտնվեց նոկդաունում, որը նրա համար նշանակում էր պարտություն:

Հանդիպման վերջնամասում հայ մարզիկը անընդմեջ հետապնդողի դերում էր ու տպավորիչ հաղթանակի հասավ: Այդ հաջողությունը Համբարձում Հակոբյանի  կամային բարձր որակների վկայությունն էր:

Այսօր մեկնարկի կելնեն մեր  երեք մարզիկներ: Բուլղարացի Կրիստիան Դիմիտրով-Ստեֆանովի հետ կմրցի   Ռաֆայել Հովհաննիսյանը  / 86 կգ /, իսկ ընդմիջումից հետո  հունգարացի Ռոլանդ Վերեշի հետ հարաբերությունները կորոշի Կարեն Տոնականյանը / 60 կգ /:

Իր երկրորդ մենամարտը կանցկացնի 75 կգ քաշային Վախթանգ Հարությունյանը:  Նա  կմրցի Գերմանիան ներկայացնող  Քևին Շումանի հետ: