Հայաստանի բասկետբոլի առաջնություններն ավարտվել են, իսկ մեր հինգ հավաքականներ  քրտնաջան պարապմունքներում են ընդգրկված:  Պետք  է պատվով  ներկայանալ  Եվրոպայի տարիքային տարբեր խմբերի առաջնություններին:

Այդ միջոցառումների մասին ՀՀ բասկետբոլի ֆեդերացիայի փոխնախագահ  Վահագն Հարությունյանը  ասաց, որ մեր չորս թիմեր ընդգրկված են  երրորդ խմբում:

Մինչև 18 տարեկան տղաների խմբային մրցավեճը կանցկացվի Սան Մարինոյում ՝  հուլիսի 24 – 31-ը: Մերոնց մրցակցներն են Ջիբրալթարի, Մոլդովայի, Ադրբեջանի և Լյուքսեմբուրգի ներկայացուցիչները:

Ջիբրալթարում  հուլիսի 12 – 17 –ը պայքարի կբռնվեն  մինչև 16 տարեկան տղաները:  Խմբում ընդգրկված են Հայաստանի, Անդորայի  և Մոլդովայի պատվիրակները:

Մինչև 16 տարեկան աղջիկների խմբայինը տեղի կունենա Ալբանիայում ՝  հուլիսի 12 -17 –ը: Մերոնք կմրցեն   Կիպրոսի և Մոլդովայի  մարզուհիների հետ:

Երրորդ  խմբում է  նաև ՀՀ տղամարդկանց ազգային  ընտրանին,  որը կմասնակցի Եվրոպայի փոքր երկրների առաջնությանը: Հայաստանի գուլիվերները  կհանդիպեն Սան Մարինոյի և Ջիբրալթարի բասկետբոլիստների հետ: Մրցաշարը տեղի կունենա  հունիսի 28 – հուլիսի 3 –ը ՝ Մալթայում: Մինչ այդ,  մեր ազգայինը կմասնակցի  Երևանում, Կարեն Դեմիրճյանի անվան մարզահամերգային համալիրում, հունիսի 23 – 26 –ը անցկացվելիք    միջազգային մրցաշարին:

Նախնական պայմանավորվածությամբ նախատեսված է արտասահմանյան երեք երկրների հավաքականների մասնակցություն: Այժմ  տեղացի կադրերով համալրված մեր թիմը նախապատրաստվում է  <<  Արաքս >> / երբեմնի << Միկա >> / մարզապալատում : Հետագայում նրանց կմիանան հավաքականի սփյուռքահայ  վարպետները:

Հայաստանի  հինգերորդ հավաքականը  մինչև 20 տարեկան աղջիկների  համակազմն  է, որն ընդգրկված է երկրորդ խմբում / Բ դիվիզիոն /: Մեր մարզուհիները  Գերմանիայի, Իսրայելի և Վրաստանի թիմերի դեմ  ասպարեզ  կելնեն հուլիսի 9 – 17 –ը`   Մակեդոնիայում: