ԻՆչպես ակնկալվում էր, Սերբիայի մայրաքաղաք Բելգրադում աշխարհի ըմբշամարտի հերթական առաջնության նկատմամբ հետաքրքրությունը մեծ է:Սկզբից ևեթ մրցագորգերի վրա ծավալվեցին դիտարժան գոտեմարտեր:

Համանուն  ստուգատեսում առաջին անգամ ավելի բարձր ՝  77 կգ քաշային կարգում հանդես եկավ աշխարհի նախորդ առաջնության՝  72 կգ քաշայինների  չեմպիոն մեր Մալխաս Ամոյանը: Փաստը մտահոգող էր և դա զուր չէր: Հենց մեկնարկում մեր ըմբիշը պարտվեց հունգար Զոլթան Լևային: Եթե Մալխասը նոր քաշային կարգում պահեստային կիլոգրամներ ուներ, ապա Զոլթանը կիլոգրամներ է բեռնաթափել:Ամեն բանից անկախ, ենթադրում ենք, որ եթե երևանցին ավելի շուտ հաստատված լիներ նոր քաշային կարգում, ապա  իրենը կաներ՝  ինչպես սփոփիչ գոտեմարտերում: Նա հաջորդաբար հաղթեց Վրաստանի , Շվեդիայի, ղազախստանի ներկայկացուցիչներին և <<  բրոնզի >>  համար պայքարի ելավ անվանի ու բազմափորձ սերբ  Վիկտոր Նեմեշի դեմ:

Սկիզբը խոստումնալից էր և թվում էր, որ պասիվության համար գորգի մրցավարը նկատողություն կհայտարարի տանտիրոջը: Բայց հակառակն արվեց և միավոր տրվեց Նեմեշին: Սա սթափեցրեց, մտահոգեց մեզ: Տրիբունաների աջակցությունը, միջազգային ֆեդերացիայի նախագահ, սերբ Նենադ Լալովիչի ներկայությունը, էլ չասենք տանտիրոջ բարձր կարգը . . . Դժվար էր այս ամենի դեմն առնելը: Բայց  ինչպես էպոսում է, մրցավարի այդ մի << զարկը  >>  Մալխասը նվիրեց հենց ֆեդերացիայի նախագահին ու ինչպես հատուկ է իրեն, մեր մարզիկը անմիջապես չորս միավորանոց հնարք կատարեց, ապա գումարեց երկու, հետո էլ մեկ միավոր և համոզիչ հաղթանակ  ՝ 7 : 1:

Մալխաս Ամոյանի նոր նվաճումը մեծ արժեք ունի, չափազանց գնահատելի է, հույս է ներշնչում, որ  նա ամրապնդվում է նոր քաշային կարգում և իր համարձակ խոսքը կասի Փարիզի օլիմպիական խաղերում: