ԵՐԵՎԱՆՑԻ ԵՐԱԽՏԱՎՈՐԻՆ ՀԱՆՁՆՎԵՑ ՊԱՐԳԵՎԸ
Ինչպես արդեն հայտնել ենք, ՀՀ սուսերամարտի ֆեդերացիայի նախագահ, Հայ-Ռուսական համալսարանի Ֆիզկուլտուրայի և առողջ ապրելակերպի ամբիոնի վարիչ, Հայաստանի ազգային օլիմպիական կոմիտեի փոխնախագահ, սուսերամարտից միջազգային կարգի սպորտի վարպետ Արմեն Գրիգորյանն ընդգրկվել է սուսերամարտի միջազգային ֆեդերացիայի Փառքի սրահում։ Որոշումը կայացրել էր ՍՄՖ-ի գործադիր կոմիտեն։
Լոզանում ՝ ՄՕԿ –ի օլիմպիական թանգարանում, օրերս կայացավ սուսերամարտի միջազգային ֆեդերացիայի վեհաժողովը: Օրակարգում ընդգրկված էին բազմաթիվ հարցեր: Ծավալուն քննարկում տեղի ունեցավ Փարիզի օլիմպիական խաղերի սուսերամարտի մրցաշարի կազմակերպական հարցերի շուրջ:
Համաժողովի շրջանակներում մարզաձևի մի խումբ արժանավորների շնորհվեցին պարգևներ: Միջազգային ֆեդերացիայի նախագահի ժամանակավոր պաշտոնակատար, հույն Էմանուել Կացիադակիսը հանդիսավորությամբ պատվավոր կոչման հավաստագիրը և ոսկե մեդալը հանձնեց Արմեն Գրիգորյանին:
Շնորհավորում ենք երևանցի երախտավորին՝ հաճելի իրադարձության համար և հաջողություն մաղթում հետագա գործունեության ընթացքում:
ՍՄՖ-ի Փառքի սրահը ստեղծվել է 2013թ.: Նպատակն է հանրությանը և մարզաշխարհին ներկայացնել մարզաձևի համաշխարհային ընտանիքում նշանակալի արդյունքներ ցույց տված և մեծ ներդրում ունեցած մարզիկներին, մարզիչներին, մասնագետներին, գործիչներին . . .
Այդկերպ նաև հարգանքի տուրք է մատուցվում մարզաձևում յուրահատուկ գնահատանքի արժանի երախտավորներին՝ ինչպիսին է մարզաձևում մեր երկրի առայժմ միակ ներկայացուցիչը:
