ՈՒՇԱԴՐՈՒԹՅՈՒՆԸ ՝ ՀԵՐԹԱՓՈԽԻՆ
Մեզանում գնահատում են բադմինթոն մարզաձևը: Լավ ավանդույթներ և հուշեր նույնպես կան: Ունեցել ենք Վարդիթեր Պողոսյան , Մարիետա Եղիազարյան , Արմեն Առաքելյան, Հովհաննես Խաչատրյան , Հայկ Միսակյան և էլի մի քանիսը: Նրանք մցանակներ են նվաճել համամիութենական մրցաշարերում, իսկ Վարդիթեր Պողոսյանը ԽՍՀՄ հավաքականի կազմում հաջողության էր հասնում մրջազգային բարձրակարգ մրցաշարերում: Նրա մարզական ուղիով էր ընթանում զարմուհին ՝ Լիլիթ Պողոսյանը: Շնորհալի աղջիկը շուրջ երեք տարի պարապեց Դանիայի ակադեմիայում և ընթացքում հուսալի մրցելույթներ անցկացրեց պատանեկան ու երիտասարդական ստուգատեսներում: Հիմա նա ծաղկուն հասակում է, բայց, ավաղ, վնասվածքի պատճառով անկարող է ելնել ասպարեզ: Լավ է, որ Լիլիթը համալրել է մարզիչների շարքը: Ի դեպ, մարզիչ են նաև նրա հայրը ՝ մարզաձևի երախտավոր Հրաչյա Պողոսյանը և Վարդիթեր հորաքույրը, որը բադմինթոն է ուսուցանում իջևանցի տղաներին և աղջիկներին:
Մարզաձևի աշխարհագրությունը, Երևանից բացի, ընդարձակում են նաև Գյումրիի, Վանաձորի և Սպիտակի մարզադպրոցներում գործող խմբերում:
Ընդհանրապես Հայաստանում բադմինթոն են խաղում ավելի քան 200 մարզիկ – մարզուհիներ: Նրանք ապահովված են անհրաժեշտ գույքով և հանդերձանքով:
Զրույցի ժամանակ վաստակաշատ Հրաչյա Պողոսյանը ասաց, որ առավել մեծ ուշադրություն են հատկացնում պատանիներին: Նրանց համար տարին հագեցած է միջազգային մրցումներով: Աժմ մարզվում են տեղերում: Մարտին մերոնք կմասնակցեն Լեհաստանում, ապրիլին Իսրայելում, իսկ հուլիսին ՝ Սերբիայում կայանալիք միջազգային պատանեկան մրցաշարերին:
Մայիսին Երևանում, հիմնովին վերակառուցված << Կիլիկիա >> մարզադահլիճում տեղի կունենա Հայաստանի պատանեկան առաջնությունը: Այն ընտրական բնույթ կկրի և արժանիները իրենց << ռակետները կխաչաձևեն >> Վիլնյուսում օգոստոսին ՝ Եվրոպայի, իսկ հոկտեմբերին ՝ ԱՄՆ –ում անցկացվելիք աշխարհի առաջնությունների մասնակիցների հետ:
