Երևանի Կարեն Դեմիրճյանի անվան մարզահամերգային համալիրին այսօր հրաժեշտ տվեցին Եվրոպայի ծանրամարտի առաջնության մասնակիցները: Իսկ վերջինը  մրցահարթակ ելան գերծանրքաշայինները:

Մարզիկների ներկայացման տողանում շարված էին 11 հերկուլեսներ: Բայց նրանցից  Սերբիայի և Հոլանդիայի ծանրորդները չելան մրցաբեմ ու նրանք բավարարվեցին ներկա ստանալով: Հասկանալի է, ստուգատեսը վարկանիշային է և Փարիզի օլիմպիական խաղեր մեկնողները պետք է հայտավորված  լինեն  վարկանիշային վեց մրցաշարի, որից մեկը երևանյանն էր:

Ասպարեզ ելած իննյակից բարձր արդյունքներով աչքի ընկավ անդրկովկասյան եռյակը. վրաստանցի  Լաշա Տալախաձե,  հայաստանցիներ Վարազդատ Լալայան և Սիմոն Մարտիրոսյան:

Նույն հերթականությամբ նրանցից յուրաքանչյուրը պոկում, հրում վարժությունների և երկամարտի արդյունքներով արժանացավ  երեքական ոսկե , արծաթե և բրոնզե մեդալի:

Ներկայացնենք նաև արդյունքները. Լաշա Տալախաձե՝  474 կգ / 222 կգ + 252 կգ /, Վարազդատ Լալայան ՝ 462 կգ / 212կգ + 250 կգ / և Սիմոն Մարտիրոսյան ՝ 440 կգ / 195 կգ + 245 կգ /:

Նշած եռյակից յուրաքանչյուրի ծանրահարթակում լինելու ժամանակ դահլիճում տիրում էր քար լռություն, իսկ հաջողության պարագայում  տրիբունաները թնդում էին ծափերից:

Ի դեպ, դեռևս նախօրյակին, զրույցի ժամանակ, Տալախաձեն ասել է, որ մանկուց է ընկերություն անում հայերի հետ: Ինչ իմանար, որ հենց հաջորդ օրը,  հայ մարզասերը  իրեն  այդքան ջերմորեն կընդուներ ու կգնահատեր հերթական՝  եվրոպական յոթերորդ  հաղթանակի առթիվ:

Թիմային պայքարում հաղթեց Հայաստանի հավաքականը, որի օգտին գրանցվեց  13 մեդալ. չորսական ոսկե,  արծաթե և հինգ  5 բրոնզե պարգև:  

Մասնակիցները գոհունակությամբ հրաժեշտ տվեցին  հյուրընկալ Հայաստանին և հայ մարզասերին՝ կրկին Երևան այցելելու ցանկությամբ: