Սաուդյան Արաբիայի Ռիադ քաղաքում  անցկացվել է ծանրամարտի միջազգային ֆեդերացիայի / IWF / կոնգրեսը: Միաձայն հաստատվել է երկու հիմնական փաստաթուղթ՝ 2024-2032թթ. ռազմավարական ծրագիրը և  կանոնադրության վերանայումը:

IWF-ի նախագահ Մուհամմեդ Ջալուդն ընդգծել է  պահի կարևորությունը. << Մենք վճռական ենք  ծանրամարտի առաջընթացը զարգացնելու գործում:  Երախտապարտ եմ  հինգ մայրցամաքների անդամ ազգային ֆեդերացիաներին, ովքեր հստակ գիտեն, թե որոնք են մեր առաջնահերթությունները:  

Ռազմավարական  առաջին ծրագիրը ստացել է  մեծ աջակցություն,  քանզի 114 պատվիրակներ հաստատել են  կարևոր ճանապարհային քարտեզը  >>:

Ներկաներին կոչ է արվել  չննջել  դափնիների վրա: Շատ նոր մարզաձևեր ցանկանում են միանալ օլիմպիական ընտանիքին: Պետք է պայքարել  ամեն օր,  ձգտել գերազանցության, վեհացնող մրցելույթների, ինչպես շարունակաբար անում են  երկաթախաղի վարպետները: Պետք է  ոգեշնչվել  մարզաձևի հանդեպ նրանց նվիրվածությունից: Այս ամենը պետք է անել  միասնության, համերաշխության և փոխադարձ աջակցության ոգով։ 

Հաստատվել է նաև սահմանադրությունը: Հատուկ փոփոխությունները հստակեցնում են ազգային ֆեդերացիաների անդամակցության ընթացակարգը, կանոնակարգերը և այլն:

Կոնգրեսը հաստատել է 2022 - ի  ֆինանսական հաշվետվությունները, տեխնիկական, բժշկական, մարզչական, հետազոտական, զարգացման և կրթական ծրագրերի և մարզիկների հանձնաժողովների զեկույցները:

Կոնգրեսի աշխատանքներին մասնակցել է նաև ՀՀ ծանրամարտի ֆեդերացիայի գլխավոր քարտուղար, միջազգային կարգի մրցավար Փաշիկ Ալավերդյանը: