Ավանդույթի համաձայն Հայաստանի ազգային օլիմպիական կոմիտեի նախագահ Գագիկ Ծառուկյանը մայրաքաղաքի Օլիմպավանում ընդունեց Փարիզի օլիմպիական խաղերի մասնակից մարզիկներին:

Ներկա էին նաև մարզական կազմակերպությունների բազմաթիվ ներկայացուցիչներ:

ՀԱՕԿ- ի գլխավոր քարտուղար Հրաչյա Ռոստոմյանի բացման խոսքից հետո խոսափողը տրամադրվեց  նախագահ Գագիկ Ծառուկյանին. «  Գլխավոր քարտուղարն արդեն ներկայացրեց, որ ՀԱՕԿ –ը լիովին  կատարել է  նախապես կազմված օլիմպիական ծրագրի  պահանջները: Նպատակային աշխատանքներ են տարվել նախապատրաստական բոլոր փուլերում:

Հարգելի մարզիկներ, դուք  դժվարին ճանապարհ եք անցել ու հաշվված օրեր հետո  Փարիզում կփորձեք իրականացնել օլիմպիական մրցանակակիր դառնալու ձեր  երազանքը:

Մեր ժողովուրդը  անհամբերությամբ է սպասում  ձեր ելույթներին, որովհետև դուք եք  մեր երկրի մարզական դեսպանները օլիմպիական խաղերում:  

Համայն աշխարհի հայ մարզասերը հաջողություն է ակնկալում ձեզանից, հավատալով, որ դուք հաղթանակներ կպարգևեք մեր երկրին ու բարձր կպահեք Հայաստանի մարզական դրոշի պատիվը:

Մեր բարեկամ երկիր Ֆրանսիայում հայկական մեծ  համայնք կա և, անշուշտ, կստանաք նաև նրանց ոգևորիչ աջակցությունը:

Փարիզի ստուգատեսին նախորդած տարիներին դուք, հարգելի մարզիկներ, բազմաթիվ խոսուն հաղթանակներ եք ձեր հաշվին գրանցել  միջազգային պաշտոնական  մրցաշարերում: Եվ ահա եկել է ժամանակը , որ  ձեր ուժն ու եռանդը  դրսևորեք առաջիկա համաշխարհային գլխավոր մարզահանդեսում . . .   », - ասել է ՀԱՕԿ –ի նախագահը: