Միջազգային օլիմպիական կոմիտեի  նախագահ Թոմաս Բախը բացման խոսքով հանդես է եկել  ՄՕԿ-ի 144-րդ նստաշրջանում: Այն անցկացվում է  Հին Օլիմպիայում, մի վայրում, որտեղ ծնվել են խաղերը:

Բախը մասնավորապես ասել է, որ Հունաստանը և հունական քաղաքակրթությունը աշխարհին երկու հրաշալի նվեր է տվել. ժողովրդավարություն և օլիմպիական խաղեր:

Հին Աթենքում է  առաջին անգամ կիրառվել  դեմոկրատական սկզբունքները: Այդ երկիրը նաև օլիմպիական խաղերի ծննդավայրն է, որտեղ 2800 տարի առաջ  եզակի նվեր մատուցվեց  համայն աշխարհի մարդկությանը:

Հին օլիմպիական խաղերը կառուցվել են արժեքների վրա, ինչպիսին , օրինակ, օլիմպիական զինադադարի ավանդույթն է:

Մենք հավերժ երախտապարտ ենք Հունաստանին և մեր հույն ընկերներին՝ այդ երկու թանկարժեք նվերների համար:

Հին Օլիմպիական խաղերը շարունակություն չունեցան, ընդհատվեցին, երբ մի կողմ դրվեցին սպորտի արժեքները: Գրեթե 2000 տարի պահանջվեց, մինչև Պիեռ դե Կուբերտենը վերակենդանացրեց այդ սքանչելի միջոցառումը: Մեծանուն գործիչը ցանկանում էր աշխարհն ավելի լավը դարձնել նաև  սպորտի և դրա արժեքների միջոցով:

ՄՕԿ-ի հիմնադիր Պիեռ դե Կուբերտենի սիրտը հավերժ է այստեղ՝ Օլիմպիայում:  Նա է  ասել, որ օլիմպիական խաղերը ուխտագնացություն են դեպի անցյալ և հավատքի ակտ՝  դեպի ապագա: Երբ  հարգանքի տուրք ենք մատուցում Կուբերտենին, մենք դա անում ենք մի կողմից՝ խոնարհությամբ, մյուս կողմից՝ վստահությամբ: Այդկերպ  ձգտում ենք կատարել մեր դերը՝ որպես նրա տեսլականի պահապաններ: Ապագայի հանդեպ մեր հավատի դրսևորումը կլինի նաև ՄՕԿ –ի  նոր նախագահի ընտրության գործը:

Թոմաս Բախի իրավահաջորդի ընտրությունը նշանակված է  վաղը, հինգշաբթի՝  մարտի 20 –ին: Յոթ  թեկնածու է հավակնում դառնալ ՄՕԿ-ի 10-րդ նախագահը: