Մեկ տարի առաջ  մոլորակի մարզասեր հասարակությունը հետևում էր Փարիզի  ամառային օլիմպիական խաղերի ընթացքին:  Տարեդարձի առթիվ կազմկոմիտեն անցկացրել է  տոնական միջոցառումներ, որին  մասնակցել է նաև միջազգային օլիմպիական կոմիտեի պատվիրակությունը:

Կազմակերպության  նախագահ Քրիսթի Քովենթրիին և պատվավոր նախագահ Թոմաս Բախին Ելիսեյան պալատում ընդունել է  Ֆրանսիայի նախագահ Էմանուել Մակրոնը։ Նրանք կիսվել են  մարզահանդեսի տպավորիչ  հիշողություններով և անդրադաձել Ֆրանսիայի  Ալպերում 2030թ.  նախատեսված ձմեռային օլիմպիական խաղերի նախապատրաստական աշխատանքներին:

ՄՕԿ-ի պատվիրակությունը հանդիպել է նաև օլիմպիականներին, եղել  արդեն օլիմպիական ժառանգություն համարվող մարզահամալիրներում, Սենա գետի ափին`   նավակների շքերթին և այլն:

Պատվիրակությունը ծանոթացել է  խաղերի մեդալակիրների հուշարձանի դիզայնին, որը  <<Փարիզ - 2024 >> -ի դափնեկիրներին նվիրված  կոթող է լինելու:

Փարիզի  համաշխարհային մարզական իրադարձության  մեկ տարվա նշանավորումը  հստակ ուղերձ է հղում  աշխարհին.  խաղերը  ավարտվել են,  բայց դրանց ոգին և ժառանգությունը շարունակվում  է  ոչ միայն Ֆրանսիայում, այլև ՝ ամբողջ աշխարհում։