ԼՈՒՅՍ Է ՏԵՍԵԼ ՄԱՅՐԵՆԻՈՎ
Կասկածից վեր է, որ աշխարհում գնդակախաղով զբաղվում են տարբեր սեռի և տարիքի միլիարդավոր մարդիկ: Հատկապես բարենպաստ եղանակային պայմաններում նույնիսկ հանգստացողների ու զբոսաշրջիկների ճամպրուկներում տեղ են գտնում գնդակներ: Մարդիկ զբաղվում են վոլեյբոլով, հանդբոլով, որոնք առավել մատչելի են բնության գրկում ու նաև լողափերում:
Առավելապես վերջին տասնամյակներում պաշտոնական մրցումների օրացուցային պլանում տեղ են գտել լողափնյա ֆուտբոլ, վոլեյբոլ մարզաձևերը: Գրեթե քառորդ դար առաջ նրանց է միացել նաև լողափնյա հանդբոլը: Մարզաձևի միջազգային ֆեդերացիան 2002թ. հրապարակել է լողափնյա հանդբոլի խաղի կանոնները: Եվ ահա ՀՀ –ում մարզաձևի մեծ երախտավոր Հարություն Մելքոնյանը և նրա դուստրը՝ մարզաձևի եվրոպական ֆեդերացիայի մրցավարական հանձնախմբի ներկայացուցիչ Աննա Մելքոնյանը խնամքով թարգմանել ու հրապարակել են << Լողափնյա հանդբոլ խաղի կանոնները >> անվանումով գիրքը:
Մայրենիով լույս ընծայված այդ ձեռնարկը մրցավարներին, մանկավարժներին, մարզիչներին, ֆիզիկական կուլտուրայի ուսուցիչներին, ուսանողներին, իհարկե նաև մարզասեր բնակչությանը կօգնի ավելի արդյունավետ կազմակերպել լողափնյա պարապմունքները, ինչպես նաև մրցումների կազմակերպմանը և անցկացմանը: Այդ նպատակին մեծապես կնպաստեն ձեռնարկում զետեղված շուրջ երկու տասնյակ նշաններ ցուցանող լուսանկարները:
Գրքի տպագրմանը երաշխավորել է Հայաստանի ազգային օլիմպիական կոմիտեն:
