Միջազգային օլիմպիական կոմիտեի յոթերորդ նախագահը եղել է իսպանացի Խուան Անտոնիո Սամարանչը։ Նա ՄՕԿ –ը ղեկավարել է 1980 – 2001թթ․։ Այսօր՝  հուլիսի 17 –ին լրացավ նրա ծննդյան 100-ամյակը։ Ծնվել է Բարսելոնում ՝ 1920թ., մահացել է 2010թ.։

Սամարանչը հայտնի քաղաքական գործիչ է, բիզնեսմեն։ 1980 թ․ Մոսկվայի օլիմպիական խաղերի ավարտից հետո ընտրվել է  ՄՕԿ –ի նախագահ: Օլիմպիական շարժման գործում ունեցած ավանդի համար Իսպանիայի թագավորը 1991թ․  Սամարանչին տվել է մարքիզի  / դոն / կոչում:

Համարվում է 20-րդ դարի օլիմպիական շարժման անենաազդեցիկ դեմքերից մեկը։ ՄՕԿ –ի ցմահ պատվավոր նախագահ էր։

Սամարանչի օրոք  օլիմպիական շարժումը ֆինանսապես  դարձավ անկախ։ Այդ գործին նպաստեցին  հովանավորները և  հեռուստատեսային հեռարձակումների պայմանագրերը, որոնք մեծ գումարներ են ապահովել ՄՕԿ-ի բյուջեին:

Սամարանչի կառավարումը փրկություն էր ՄՕԿ-ին, որը 1970-ական թվականների ճգնաժամից հետո ֆինանսապես գրեթե ոչնչացած էր։

Օլիմպիական խաղերի պատմությունում  Խուան Անտոնիո Սամարանչը մնացել  է որպես օլիմպիական շարժումը վերածնած   մարդ  -  ղեկավար։

Հայաստանի մարզական կյանքի և օլիմպիական շարժման հետագա զարգացման համար նշանակալի երևույթ էր 1994թ. ապրիլին  Սամարանչի գլխավորած ՄՕԿ –ի պատվիրակության այցը Հայաստան։

Այցելելով Ծաղկաձորի օլիմպիական գլխավոր մարզահամալիր, ծանոթանալով մարզակառույցներին, վերկանգնողական կենտրոնին, հյուրանոցային համալիրին, սննդի օբյեկտներին և այլն, Սամարանչն ասել է, թե հիմա  արդեն   հասկանալի է խորհրդային, այդ թվում`  հայաստանցի մարզիկների հաջողությունների գաղտնիքը։ Նա նաև  այցելել է  մարզահամերգային համալիր, << Հրազդան >> ստադիոն և այլուր։