Ձյուդոյի եվրոպական միությունը  / EJU / աշխարհում շարունակվող  համավարակի  պատճառով չեղյալ է   հայտարարել  օլիմպիական  մարզումային  երկու հավաքները / Խորվաթիայում և Իսպանիայում /: 

Ֆեդերացիայի հաղորդագրությունում ասվում է, որ  վարակի երկրորդ ալիքը շարունակվում է տարածվել  մայրցամաքով, տարբեր երկրներ կրկին  վերադառնում են խիստ սահմանափակումների, մարզիկների համար դժվար է ճանապարհորդել և մրցել առանց կարանտինի։

Այդ պատճառով որոշվել է  հրաժարվել նաև  այս ամսին Մալագա քաղաքում նախատեսված եվրոպական բաց մրցաշարից ,  Զագրեբում՝   մինչև 18 տարեկանների  և Լիգնանոյում ՝  մինչև  21 տարեկանների  Եվրոպայի գավաթի խաղարկություններից։

Միևնույն ժամանակ,  օրացույցում ուժի մեջ են մնում մինչև  21 և 23 տարեկանների Եվրոպայի առաջնությունները, որոնք  նոյեմբերին պետք է  կայացվեն  Խորվաթիայի Պորեչում։ 

EJU- ն մտադիր է  Պրահայում անցկացնել Եվրոպայի մեծահասակների առաջնությունը, որը բազմիցս հետաձգվել է: Վերջին որոշման համաձայն այն  նշանակված է  նոյեմբերի 19-21-ը: 

Եվրոպայի  առաջատար ձյուդոիստների համար երկարատև  դադարից հետո առաջին խոշոր մրցաշարը  կլինի Բուդապեշտում կայանալիք << Մեծ սաղավարտ >> -ի մրցաշարը: Օրերս  միջազգային ֆեդերացիան  / IJF /  հաստատեց այդ ստուգատեսի առաջին փուլի  անցկացումը՝ հոկտեմբերի 23-25-ը։

Այդ մրցաշարի  պաշտոնապես հաստատման առիթով  ձյուդոյի միջազգային ֆեդերացիայի / IJF /  նախագահ Մարիուս Վիզերն ասել էր․ << Սա պատմական պահ է համաշխարհային ձյուդոյի և սպորտի համար: Մենք անհամբեր սպասում ենք  << Մեծ սաղավարտի  >> անցկացմանը միջազգային ֆեդերացիայի, առողջապահության և անվտանգության միջոցառումների  կանոններին համապատասխան: Դժվարին ժամանակներում պետք է հարմարվենք COVID-19- ին։ Կանենք ամեն ինչ , որպեսզի մարզիկները կարողանան դրսևորել իրենց  ունակությունները >>։

Նշենք, որ մրցումներում կխաղարկվեն  օլիմպիական վարկանիշային միավորներ: