ՄՈՏՈՌԻԱԼ ՄԱՐԶԱՁԵՎԻ ՀԱՅՏԸ

12:02 - 23 Հոկ, 2020

Մոտոռիալը տեխնիկական  մարզաձև է և  կարող է ընդգրկվել Կրակովում 2023թ․ կայանալիք   եվրոպական երրորդ խաղերի ցուցադրական ծրագրում։

Հարցը  քննարկել են Լեհաստանի  ԱՕԿ –ի ղեկավար Անջեյ Կրասնիցկին և մոտոցիկլային սպորտի միջազգային ֆեդերացիայի  / FIM / նախագահ Խորխե Վիեգասը:

Մարզաձևը  շատ բարդ է և դիտարժան։  Մրցումներում նախատեսվում է օգտագործել միայն էլեկտրական մոտոցիկլներ: Մարզիկները հաղթահարում  են   արհեստական ու  բնական  դժվարին մրցուղիներ ՝ նետվելով մի խոչընդոտից մյուսը: Մրցակարգի համաձայն ոտքերը գետնին չպիտի դիպչեն: 

FIM  - ը արդեն դիմել է ԵՕԿ –ին  ցուցադրական հրապարակ  տրամադրելու խնդրանքով: Ծրագիրն ամբողջությամբ ֆինանսավորելու է միջազգային ֆեդերացիան,  իսկ նախապատրաստությունը կիրականացնի Լեհաստանի ավտոսպորտի ասոցիացիան: 

Անցյալ տարի  ֆեդերացիան ՄՕԿ - ին առաջարկել էր մարզաձևի  փորձարկումը ներառել <<  Փարիզ – 2024 >>  խաղերի ծրագրում: Այնուամենայնիվ, ՄՕԿ-ը մինչ օրս որևէ  ավտոմոբիլային կամ մոտոցիկլային մարզաձև  չի ճանաչել: 

Սեպտեմբերին եվրոպական  երրորդ խաղերի կազմկոմիտեն EOC- ի հետ միասին հաստատեց  մրցումների նախնական ծրագիրը: Այն ընդգրկում է նետաձգություն, սինխրոն լող, բադմինթոն, 3x3 բասկետբոլ, լողափնյա հանդբոլ, բրեյքդանս, կանոե, ակադեմիական թիավարություն, հեծանվասպորտ  / լեռնային և խճուղային  /, սուսերամարտ, մարմնամարզություն, ձյուդո, կարատե, ժամանակակից հնգամարտ, լեռնային վազք, ռեգբի 7, հրաձգություն, ժայռամագլցում, սեղանի թենիս, տրիաթլոն, վոլեյբոլ / դասական և լողափնյա/ , ըմբշամարտ , ծանրամարտ մարզաձևերը։

Ակնկալվում է, որ Եվրոպական խաղերում, որոշ մարզաձևերում,  կխաղարկվեն նաև Եվրոպայի առաջնությունների մեդալներ  ու  << Փարիզ – 2024 >>  օլիմպիական խաղերի ուղեգրեր:

 

Այլ նորություններ