Հայաստանի բասկետբոլի ֆեդերացիայի նախագահ, միջազգային բարձրագույն կարգի մրցավար Հրաչյա Ռոստոմյանը հանդիպել է մարզչական կազմի հետ։

Քննարկվել են ընթացիկ աշխատանքներն ու  հետագա ծրագրերը:  Երևանում հուլիսին պետք է տեղի ունենա  մինչև 20 տարեկան մարզուհիների Եվրոպայի առաջնության՝  չելենջ-մրցաշարը: Լուրջ ուշադրություն պետք է հատկացնել նախապատրաստության հարցերին:

Վերլուծել են նաև  Հայաստանի պատանեկան բասկետբոլի համապետական մրցաշարերի արդյունքները։ Այս առումով չափազանց կարևոր են մարզիչների բանիմաց, նպատակային աշխատանքները: Պատանիներն ավելի հեշտ են յուրացնում տեխնիկական հնարքները, մտապահում տակտիկական պարզ առաջադրանքները: Այդ ամենը մրցումների ընթացքում խաղացողները  հղկում, աստիճանաբար հասունանում, ձևավորվում ու դառնում են հուսալի վարպետներ:

Տեղի է ունեցել մտքերի փոխանակություն, որի ընթացում արծարծվել են մարզաձևին վերաբերող բազմաթիվ հարցեր:

Հիշեցնենք, որ մինչև 20 տարեկան բասկետբոլիստուհիների Եվրոպայի առաջնության չելենջ–մրցաշարի D ենթախմբի հանդիպումները կկայանան Հայաստանում, հուլիսի 13-18- ը՝  Երևանի նախկին << Արաքս >> - << Միկա >>  մարզապալատում։