Մարզական բախտը երես է թեքում շնորհալի ծանրորդ Անդրանիկ Կարապետյանից: Արդեն որերորդ անգամ  նրան դավաճանում են վնասվածքները: Ահավասիկ, Ուզբեկստանի մայրաքաղաք Տաշքենդում ընթացող  աշխարհի առաջնությունը:

89 կգ քաշայինների պայքարի պոկում վարժությունը  գերազանց սկսեց և ավարտեց էջմիածինցի վարպետը: Նա  գլխավերևում պահեց 175 կգ կշռող ծանրաձողը, չորս կիլոգրամով առաջ անցավ իրեն հետապնդող վրացի Ռևազ Դավիթաձեից և արժանացավ  ոսկե մեդալի:

Հրում վարժությունը Անդրանիկը սկսեց 196 կգ –ով: Առաջին մոտեցմամբ նա հեշտությամբ գլխավերև  հանեց ծանրաձողը, բայց պահել, ավաղ, նրան չհաջողվեց:  Նման մոտեցումը զարմացրեց: Թվաց, թե հայ մարտիկը  ընդհանրապես չպայքարեց: Երկրորդ փորձի ժամանակ հասկացանք, որ  ձախողակը  ազդրի վնասվածք էր ստացել ու թեև բժիշկները ընդմիջմանը <<  աշխատեցին >> , բայց լիովին ցավազրկել նրանց չհաջողվեց: Արդյունքում Անդրանիկը 0 ստացավ և բարձրագույն պարգևների արժանի մեր  պատվիրակը զրկվեց երկամարտում աշխարհի առաջին ծանրորդը լինելու պատվից:

Դեկտեմբերի 14 –ին  մրցման կելնեն  Դավիթ Հովհաննիսյանը և  Հակոբ Մկրտչյանը  /  երկուսն էլ ՝ 96 կգ /: