Փարիզի ամառային օլիմպիական խաղերի բացումը տեղի կունենա ոչ թե  մարզադաշտում, ինչպես ընդունված է, այլ  . . . Սենա գետի ափին: Եվ ահա միջոցառման կազմկոմիտեն հայտարարել է  մի շարք ջրային ընկերությունների հետ կնքված համագործակցության մասին: Նրանք աշխարհի հինգ մայրցամաքների օլիմպիական պատվիրակությունների անդամներին կտրամադրեն իրենց նավակները:

Արդեն փարիզյան և տարածաշրջանային 116  նավակ  կա, որոնք Սենայի  << օլիմպիական ջրերը >> ակոսել կսկսեն 2024թ. հուլիսի 26-ից։ Գետերի  42 ընկերություններ են  առայժմ համաձայնել ներդրում ունենալ աշխարհի ամենախոշոր սպորտային իրադարձությունում:

Նավերը կանցնեն Սենայի երկայնքով՝ Աուստերլից և Յենա կամուրջների միջև ընկած վեց կիլոմետրանոց տարածությունը:  

Սենա գետը և  նավակները անբաժան են։ Բացման արարողության ժամանակ օլիմպիականները կծանոթանան և կհիանան առափնյա կողմերում գտնվող պատմամշակութային կոթողներին:

Նավակները, ի դեպ, մշտապես ակոսում են Սենայի ջրերը և տարեկան ավելի քան ութ միլիոն զբոսաշրջիկ է օգտվում ջրուղուց, ասել է թե ՝ օլիմպիական  նավակները նույնպես կմտնեն պատմություն:

33 –րդ օլիմպիական խաղերի մեկնարկին մնացել է 457 օր: