Դժվար է գերագնահատել  այն ուրախությունը , որով  օրերս պարուրվել  են եգիպտահայերը: Գրեթե ամբողջ համայնքն է ներկա եղել  Կահիրեում անցկացված սպորտային մարմնամարզության առանձին գործիքներից աշխարհի գավաթի խաղարկության  վերջին ՝ չորրորդ փուլին մասնակցած  հայրենակիցների փառահեղ մրցելույթներին: Մանավանդ աշխարհի գործող չեմպիոն, հենացատկում 2023թ. աշխարհի եռակի գավաթակիր  Արթուր Դավթյանի անզուգական կատարումները, նժույգթափերում  << արծաթազօծված  >> Գագիկ Խաչիկյանի, նույն գործիքի վրա  <<  բրոնզի >>  արժանացած Հարություն Մերդինյանի և օղակներում երրորդը ճանաչված Արթուր Ավետիսյանի  բարձր վարպետությամբ հիացած ներկաների ուրախությունն ու ոգևորությունը  անափ է եղել:  Հայորդիների հաջողությունը հպարտություն է  պարգևել առանձնապես Եգիպտոսում ՀՀ դեսպանության աշխատակազմին:

Փայլուն մրցելույթները բարձր է գնահատել և մեդալակիր քառյակին ու մարզիչներին դեսպանատանը հյուրընկալել է մեր դիվանագիտական անձնակազմը ՝ դեսպան Հրաչյա Փոլադյանի գլխավորությամբ:

Հուսանք, որ մեր մարմնամարզիկները գլխավոր մարզիչ Հակոբ Սերոբյանի ղեկավաուրթյամբ  իրենց վայել վարպետությամբ հանդես կգան նաև Բելգիայում սեպտեմբերին անցկացվելիք աշխարհի առաջնությունում , որտեղ մեդալներից բացի, կխաղարկվեն նաև Փարիզ – 2024 –ի մասնակացության օլիմպիական ուղեգրեր: