Սաուդյան Արաբիայի Ռիադ քաղաքում  շարունակվում է ծանրամարտի աշխարհի առաջնությունը: Հայաստանի մարզիկներից այսօր երեկոյան ծանրահարթակ կելնեն  Եվրոպայի չեմպիոններ Ռաֆիկ Հարությունյանը (81 կգ) և  Անդրանիկ Կարապետյանը (89 կգ): Ստուգատեսին զուգահեռ անցկացվեց հակադոպինգային կրթական սեմինար:

Ներկաներին   հիանալի  հնարավորություն էր տրված   հակադոպինգային միջոցառումների վերաբերյալ թարմացված տեղեկատվություն ստանալ:

Սեմինարի ընթացքում դասախոսություններով հանդես եկան ծանրամարտում մեծ հեղինակություն  վայելող ներկայացուցիչներ:  

<< Միջազգային թեստավորման կազմակերպության / ITA /  հետ համագործակցության  շնորհիվ մենք ունենք ամուր, թափանցիկ և հուսալի ռազմավարություն >> ,- ասել է  ֆեդերացիայի գլխավոր քարտուղար Անտոնիո Ուրսոն:

Նա հստակորեն արտահայտել է  IWF-ի վճռականությունը սպորտում դոպինգը արմատախիլ անելու համար: Պետք է  աշխատել  ազնիվ, պրոֆեսիոնալիզմով և էթիկայի իրական զգացումով:  

ֆեդերացիան  հակադոպինգային գործողությունների վրա ծախսում  է  տարեկան բյուջեի ավելի քան մեկ երրորդը: Այդ գումարի մի մասը կարելի էր ծախսել մարզաձևի զարգացման միջոցառումների վրա, դա շատ ավելի օգտակար կլիներ ծանրամարտի առաջընթացի  համար:

Ի տարբերություն դեղերի, սննդային հավելումների պիտակավորումն այնքան էլ խիստ չէ, ուստի երբեք երաշխիք չկա, որ հավելումներ ընդունելը ռիսկեր չի պարունակում: Շուկայում չկա մեկ հավելում, որը 100% անվտանգ  լինի:

Արգելված նյութերի օգտագործումը  հսկայական վտանգ է ներկայացնում մարզիկի առողջության համար: Շատ դեպքերում հետևանքներն անդառնալի են:  

Մտածելով մարզիկների առողջության ռիսկերի մասին ՝ բանախոսները  խոստովանել են , որ շատերը  տեղյակ չեն դոպինգի բացասական հետևանքների մասին: Պետք է կրթել համատասխան  անձերին, որպեսզի նրանք չզղջան սխալ ընտրության համար: