Եվրո-2024-ի ընտրական մրցաշարի 6-րդ տուրում Հայաստանի ֆուտբոլի  հավաքականը Վազգեն Սարգսյանի անվան «Հանրապետական» ստադիոնում ընդունեց աշխարհի առաջնության բրոնզե մեդալակիր Խորվաթիայի հավաքականին։

Գրանցվեց միայն մեկ գոլ, որը հաղթանակ բերեց հյուրերին:

Տանտերերի դարպասին նշանակված անկյունայինի իրացումից հետո, 14-րդ րոպեին, հաշիվը բացեց Գերմանիայի  «Հոֆենհայմի» 32-ամյա հարձակվող Անդրեյ Կրամարիչը:

Մեր թիմի խաղացողները աչքի ընկան նվիրական խաղով և ուժերի  անմնացորդ  լարումով պայքարեցին մինչև վերջին վայրկյանները: Հատկապես երկորդ խաղակեսի միջնամասից հետո նույնիսկ նախաձեռնողի դեր ստանձնեցին, նաև գոլային իրական պահեր ստեղծեցին:

Այնուամենայնիվ պետք է առանձնացնել  եվրոպական փուլի հանդիպումներում վարպետ խաղով աչքի ընկնող մեր դարպասապահ Օգնեն Չանչարևիչին: Իսկ տվյալ մրցամարտում նա գերազանցեց սպասելիքները: Եթե չլինեին նրա զարմանահրաշ կատարումները, ապա մրցակիցները ավելի խոշոր հաշվով հաղթանակ կտոնեին:

Հետխաղյա մամուլի ասուլիսում  մեր ընտրանու գլխավոր մարզիչ Ալեքսանդր Պետրակովը բարձր գնահատեց իր տղաներին՝ նվիրվածության և անկոտրում կամք դրսևորելու համար: Իսկ մենք ՝ մարզասերներս, շնորհակալ ենք նաև Պետրակովին՝ հրաշալի համակազմ ստեղծելու և մասնագիտական բարձր որակներով մեզ գոհացնելու համար:

Խմբային մրցաշարում  խորվաթները չորս  խաղից հետո 10 միավորով գլխավորում են մրցաշարային աղյուսակը։ Նույնքան միավոր, բայց հինգ հանդիպումից հետո, ունեն նաև երկրորդ տեղում ընթացող թուրքերը: Եռյակը հինգ խաղից հետո, յոթ միավորով եզրափակում է մեր հավաքականը:

Հոկտեմբերի 12 –ին Հայաստանի  ֆուտբոլիստները Ռիգայում կմրցեն լատվիացիների հետ: