Փարիզում  նախապատրաստական  որոշ  աշխատանքներ  հետ  են մնում   ժամանակացույցից: Օրինակ՝  օլիմպիական ավանը, Grand Palais հուշարձանը, Կոլոմբես լողավազանը և այլն:

Նախագծի պատասխանատու  <<  Solideo >>  ընկերության ղեկավարությունը  հաստատակամ  է, որ ամեն ինչ պատրաստ կլինի ժամանակին:

Ընդհանուր առմամբ օլիմպիական խաղերի համար նախապատրաստվում է  70  մրցավայր:

Կարևորվում է նաև Փարիզի հյուսիսում և հարավում  անցկացվող  մետրոյի գծերի ընդլայնման ծրագիրը, որը  կավարտվի մինչ  համաշխարհային   գլխավոր մարզական  իրադարձության մեկնարկը:  

Կազմակերպիչները նույնպես լավատես են այս հարցում:   Օլիմպիական  խաղերի  համակարգող կոմիտեի ղեկավար  և սպորտի ազգային գործակալության տնօրեն Միշել Կադոն  Սենատի հանձնաժողովին   հավաստիացրել է, որ << Փարիզ - 2024-ը >>  կանցկացվի ժամանակին և հուլիսի 26-ին նշանակված  բացման արարողությունը կլինի պատմության ամենադիտարժան իրադարձություններից մեկը:

Կադոն  նաև ասել է, որ դեռ  քննարկման փուլում է  բացման արարողությանը ներկա գտնվելիք  հանդիսականների թվի հարցը:  

Կազմակերպիչները սկզբում  հայտնում էին, որ միջոցառմանը կմասնակցի 600,000 մարդ`  մեծ մասը անվճար: Սակայն վերջին գնահատականներով, ըստ ոստիկանության և այլ աղբյուրների, ներկա կլինի 500,000 մարդ:  Հարցը բազմիցս քննարկումների առարկա է հանդիսացել, նկատի է  առնվում  հատկապես անվտանգության խնդիրը:

Շահարկումներ են եղել  նաև հնարավոր << Պլան Բ >> -ի մասով,  այլընտրանք, որը ենթադրում  է վերադարձ մարզադաշտ: Այնուամենայնիվ, անցած շաբաթ, Կադոն բացառել է  այդ տարբերակը, քանի որ այդ ժամանակ << Աթլետիկս >>  ստադիոնը  զբաղված կլինի ռեգբիի խաղով:

Արտակարգ իրավիճակների պլանները ներառում են  նաև Սենա գետը, որը  կխաղա երկակի դեր:  Այն  կդառնա օլիմպիական խաղերի բացման, ինչպես նաև բաց ջրերում լողի և եռամարտի մրցումների վայր: