Համակրելի երիտասարդ է 20 - ամյա  Գոռ Սահակյանը: Համեստ պահվածքով վեդեցի մարզիկը ծանրահարթակի վրա մի տեսակ քողարկված արժանապատվություն է դրսևորում: Այս մասին  հպարտությամբ են նշում  մասնագետները: Իսկ Գոռը իր մրցելույթներով է հաստատում ասածը:

Բուլղարիայի մայրաքաղաք Սոֆիայում շարունակվող ծանրամարտի Եվրոպայի առաջնությունում նա չափազանց դժվարին քննություն հանձնեց: Հեշտ չէ ասել, որ 67 կգ քաշային կարգում,  մեդալների համար պայքարում, նրան  յուրատեսակ աքցանի մեջ էր առել թուրք - ազերական եռյակը:

Առաջին՝ պոկում վարժությունում, մեր մարզիկը բավարարվեց 140 կգ արդյունքով, որը << բրոնզի >>   արժեք ունեցավ: Այս հանգամանքը կարծես թևավորեց մրցակիցներին, որոնք հպարտությամբ էին շրջում նախավարժանքի սրահում: Փոխարենը Գոռն  իր հանդարտ պահվածքով կարծես մոռացել էր պայքարի մասին:

Երկրորդ ՝ հրում վարժությունը աստիճանաբար մոտենում էր ավարտին: Ահա ասպարեզում մնացին հիշյալ եռյակը և, ինչպես հետագա ընթացքը ցույց տվեց, խիզախ հայորդին:

Մրցակիցները մոտենում էին պատվիրած քաշին, ձախողվում ու աստիճանաբար մարում էր նրանց վստահ պահվածքն ու  դեմքի ժպիտը: Թուրքերից վերջին մոտեցումն ավարտեց նաև  Քաան Քահրիմանը, որի երկամարտի արդյունքն է  310 կգ: Նրա թիմակից Ֆերդի Արդալը բավարարվել էր 304 կգ –ով, իսկ ազերին հաջորդում էր նրանց:

Եվ ահա Գոռի առաջին մոտեցումը՝ 171 կգ: Ծանրաձողի հետ կամային, դժվարին պայքարում հաղթեց անկոտրում Գոռը և երկամարտի 311 կգ –ով  հռչակվեց Եվրոպայի չեմպիոն: Նրան արդեն համակրող դահլիճը փոթորկաց ծափերից, որը կրկնվեց նաև պարգևատրության ժամանակ, երբ ամենավերին աստիճանին Գոռ Սահակյանն էր, իսկ ներքևում՝ մրցակիցները:

Դա  մեր ծանրորդի երկրորդ անընդմեջ հաղթանակն էր Եվրոպայի առաջնությունում: Հիշենք, որ նախորդ մրցաշրջանում նա իր նորամուտը ազգային գլխավոր թիմում  հաղթանակով պսակեց  Կարեն Դեմիրճյանի անվան Երևանի մարզահամերգային համալիրում անցկացված համանուն ստուգատեսում: 

Այդպես շարունակիր, շնորհալի ու մեծ հայրենասեր երիտասարդ:

Վաղը, ժամը  22. 00 –ին  մեր ծանրորդներից  ասպարեզ կելնի  Ռաֆիկ Հարությունյանը / 81 կգ /: