Օրսե թանգարանում ներկայացվել են Փարիզի օլիմպիական և պարալիմպիկ խաղերի  պաստառները: Հեղինակը Ֆրանսիացի նկարազարդող Ուգո Գատտոնին է: Նա  արվեստի գործերը ստեղծելիս համադրել է իր յուրահատուկ ոճը Փարիզ 2024-ի առաջարկությունների հետ։ Պաստառների ձևավորման  մեջ տարբերակում չի դրվել օլիմպիական և պարալիմպիկ խաղերի միջև: Այդ ամենը արվել է  հավասարության ոգով:

Ինչպես ջահի և թալիսմանների պարագայում, պաստառները միմյանց հետ կապված են ու միավորված: Դրանք   թանգարանում կմնան  մինչև մարտի 10-ը և հասանելի կլինեն այցելուների համար:

Պաստառներն իրենց մեջ  պարունակում են միկրոտարրերի, փոքրիկ տեսարանների հագեցած հարուստ  կոմպոզիցիա: Ուգո Գատտոնիին, հրավիրում է մարդկանց «թափառել նկարի մեջ»,  այսինքն այնտեղ հնարավոր է «ընկղմվել ու ազատ զբոսնել»։ Փարիզն այդտեղ պատկերված է մեծ մարզադաշտ-քաղաքի տեսքով, որտեղ  վերադասավորված ու  վերաիմաստավորված են հանրածանոթ վայրերը, հուշարձաններն ու խորհրդանիշները: Այդկերպ  կամրջվում են 1900թ., 1924թ. և  2024թ. Փարիզի օլիմպիական մարզահանդեսները։

Արվեստի այդ  գործը ստեղծելու վրա նկարիչը աշխատել է 2023թ. սեպտեմբերից մինչև 2024թ.  հունվարը: Ընդհանուր առմամբ երկու պաստառների վրա ծախսվել է  շուրջ  2000 ժամ: