Կարելի է  պատկերացնել,  թե որքան դժվարին ու պատասխանատու օրեր են անցկացնում Փարիզի օլիմպիական խաղերի հայաստանցի մասնակիցները: Մարզիկների խնդիրն  է վստահ մրցելույթներով  հաջողության հասնել ու արդարացնել սպասելիքները, իսկ մարզիչների պարագայում ասածին ավելանում է ժամանակացույցի  ճշգրիտ ընտրությունը՝  սաներին լավագույն մարզավիճակով ասպարեզ հանելը: Մի խոսքով օրավուր մոտենում է օլիմպիական քառամյա  փուլում կատարած   աշխատանքների հաշվետվության ժամանակը: Իսկ խաղերի մեկնարկին մնացել է ընդամենը չորս օր:

Պատասխանատվության զգացումով է պարուրված նաև հունահռոմեական ըմբշամարտի հավաքականի գլխավոր մարզիչ Արմեն Բաբալարյանը: Նա այդ պաշտոնում առաջին անգամ է ներկայանում օլիմպիական խաղերին:

Մարզիչը երեք օլիմպիականներ Սլավիկ Գալստյանին  ( 67 կգ), Մալխաս Ամոյանին (77 կգ), Արթուր Ալեքսանյանին  (97 կգ) և նշած քաշային կարգերի երկրորդ համարներին նախավերջին ուսումնամարզական հավաքում էր ընդգրկել Վլադիկավկազում: Այնտեղ էին նաև Ռուսաստանի, Ղազախստանի և  Կիրգիզիայի օլիմպիական ըմբիշները: Հասկանալի է, որ համատեղ մարզումներով մասնակիցները հղկում էին տեխնիկատակտիկական համապատասխան որակները:

Հուլիսի 21 –ից մինչև օգոստոսի 3 –ը, արդեն Երևանում,  վերջին՝ ամենավճռական փուլն են  անցկացնում մեր եռյակը, նրանց մարզիչները և երիտասարդական հավաքականը / վերջինը նախապատրաստվում է Իսպանիայում սեպտեմբերի 1 – 3 –ը նշանակված աշխարհի երիտասարդական առաջնությանը /:

Մեր ընտրյալներից առաջինը օլիմպիական  մրցագորգ կելնեն Արթուր Ալեքսանյանը և Մալխաս Ամոյանը / օգոստոսի 6 –ին / , իսկ հաջորդ օրը՝ Սլավիկ Գալստյանը:

Հունահռոմեական ոճայինները Ֆրանսիա կմեկնեն համապատասխանաբար օգոստոսի 3 –ին և 4 –ին: