Միջազգային օլիմպիական կոմիտեի (ՄՕԿ) նախագահ Թոմաս Բախը հայտարարել է, որ օլիմպիական շարժման մեջ խտրականություն չկա: Այս մասին նա խոսել է Փարիզում՝  կազմակերպության 142-րդ նստաշրջանի բացման արարողության ժամանակ։

Վեհաժողովը տեղի   է  ունեցել Louis Vuitton  hիմնադրամի խորհրդանշական շենքում,  որտեղ Պիեռ դե Կուբերտենը 1894թ.  անցկացրել է պատմական կոնգրեսի վերջին երեկոն:  

« . . .  Մարզիկները ներկայացնում են ավելի լավ ապագայի մեր ընդհանուր հույսը: Նրանք  մեզ ցույց են տալիս, թե ինչպես պետք է խաղաղ ապրել մեկ հարկի տակ՝  օլիմպիական ավանում: Օլիմպիական շարժման մեջ  բոլորս հավասար ենք, չկա խտրականություն, - ասել է Բախը և շարունակել : - Այս դժվարին ժամանակներում աշխարհում  մարդկությանը բաժանող շատ ուժեր կան.  պատերազմներ և հակամարտություններ,  համաշխարհային տնտեսության պառակտում, ագահություն, ատելություն, կեղծ լուրեր, պրոտեկցիոնիզմ . . .   ցանկը կարելի է  շարունակել:

Մարդկությունը  կուշտ է  ատելությունից, ագրեսիայից, սպանություններից, պատերազմներից և առճակատումից: Մենք ձգտում ենք մի բանի, որը մեզ միավորում է: Մենք անհամբերությամբ սպասում ենք  Փարիզի օլիմպիական խաղերի մեկնարկին՝ որպես հույսի խորհրդանիշ, որպես միասնության խորհրդանիշ:

Միջազգային օլիմպիական կոմիտեի (ՄՕԿ) համար ֆինանսը  համերաշխության գործիք է: Մեր կոմերցիոն գործընկերների ֆինանսական աջակցության շնորհիվ  արդեն ունենք 7,3 միլիարդ դոլար եկամուտ 2025-2028թթ.՝  հաջորդ օլիմպիական խաղերի համար և  դրանք միայն կավելանան:  Իրավիճակն այնքան կայուն է, որ մեզ թույլ է տալիս 10%-ով ավելացնել օլիմպիական համերաշխության բյուջեն, որը կհասնի  650 միլիոն դոլարի ՝ գալիք  մարզահանդեսների  համար »:    

Թոմաս Բախը նաև  նշել է, որ  կա 206 ազգային օլիմպիական կոմիտե,  որոնք  գործում են ՄՕԿ –ի կանոնադրությամբ՝  խարտիայի  համաձայն:

ՄՕԿ-ի  նստաշրջանի բացման արարողությանը ներկա էր  Ֆրանսիայի նախագահ Էմանուել Մակրոնը: