Ամառային 33 –րդ օլիմպիական   խաղերի մրցումային ասպարեզները  կազմ ու պատրաստ դիմավորեցին մասնակիցներին: Մեկնարկային  տենդը  հաջողությամբ  կարողացան հաղթահարել Հայաստանի սպորտային մարմնամարզության պատվիրակները.  մարզաձևի մեր առաջատար Արթուր Դավթյանը և Վահագն Դավթյանը:

Տոկիոյի օլիմպիական խաղերի բրոնզե մեդալակիր,աշխարհի չեմպիոն, հենացատկորդ  Արթուր Դավթյանը որակավորման փուլում վաստակեց 14, 666 միավոր, գրավեց յոթերորդ տեղը և մտավ  եզրափակիչ ությակ:

Դարձյալ յոթերորդ արդյունքով  վճռական  փուլ մտավ  նաև Վահագն Դավթյանը, որը օղակների վրա  վարժությունում  վաստակեց 14, 733 միավոր: Նրանք օգոստոսի 4 –ին վճռական պայքարի կելնեն խաղարկվող մեդալների համար:

Փարիզի օլիմպիական խաղերում Հայաստանի 15 ներկայացուցիչներից  առաջինը մրցավեճի ելավ   Վարսենիկ Մանուչարյանը։ Նա  100 մ բատերֆլայ լողաոճի իր լողահերթում ցույց տվեց 1:01.24 վրկ.  ժամանակ, բարելավեց անձնական ցուցանիշը և  ընդհանուր հաշվարկով  գրավեց  26-րդ տեղը:

Ենթադրվում էր, որ եզրափակիչում կհայտնվի  հրաձգուհի Էլմիրա Կարապետյանը: Օդամղիչ ատրճանակով,  10 մ հեռավորությունից նա վաստակեց  576 միավոր և գրավեց իններորդ տեղը: Ափսոս,  երևանցին ընդամենը մեկ միավորով ետ մնաց ութերորդ տեղը զբաղեցրած մրցակցուհուց:

Այսօր մեր պատվիրակությունը մասնակից չունի, իսկ վաղը՝ հուլիսի 29 –ին, ռինգում  իր առաջին մենամարտը կանցկացնի մեր գերծանրքաշային բռնցքամարտիկ Դավիթ Չալոյանը: Մրցակիցն է  անգլիացի Օրիե Դելիկուսը:

Հանդիպումը նշանակված է  Երևանի ժամանակով 23։50-ին։