ԱՐԱՀԵՏԸ ԲԱՑՎԱԾ Է
Փարիզի օլիմպիական խաղերում Հայաստանի մարզիկներից այսօր ասպարեզ ելան սպորտային մարմնամարզիկներ Արթուր Դավթյանը և Վահագն Դավթյանը:
Նրանք հաջողությամբ հաղթահարել էին որակավորման փուլը և մտել եզրափակիչ ությակ:
Հայ մարզասերը չէր կասկածում երևանցի հենացատկորդ Արթուր Դավթյանի բարձր վարպետությանը: Նախ՝ մեր պատվիրակը մրցումային մեծ փորձ ունի, սա նրա օլիմպիական չորրորդ մասնակցությունն է, աշխարհի, Եվրոպայի բազմակի չեմպիոն, մրցանակակիր է և Տոկիոյի օլիմպիական խաղերի բրոնզե մեդալակիր: Այս ամենը հաջողության հույս էին ներշնչում: Եվ հայ մարզիկը արդարացրեց սպասելիքները:
Երկու ցատկերի հաշվարկով նա վաստակեց 14, 966 միավոր, գրավեց երկրորդ տեղը, նվաճեց Փարիզի օլիմպիական խաղերի փոխչեմպիոնի կոչումը և Հայաստանի մարզիկներից առաջինը մեր պատվիրակության հաշվեկշռին մեդալ պարգևեց, այն էլ ՝ արծաթե:
Արթուր Դավթյանի օլիմպիական մեդալների աստիճանական՝ բրոնզե, ապա արծաթե պարգևների հաջորդականությունը կարծես նրան պարտավորեցնում է մնալ գործուն սպորտում, մասնակցել նաև Լոս Անջելես – 2028 օլիմպիական խաղերին և հինգերորդ փորձով ստանալ գերազանց գնահատական ՝ ոսկե պարգև:
Գոհունակությամբ նշենք, որ օղակների վրա վարժության վճռական փուլում ուժեղագույն ությակի միջև ծավալվեց անմռունչ, բայց ՝ լարված պայքար: Մեր Վահագն Դավթյանի վարպետությունը և գրաված վեցերորդ տեղը գոհացրեց, մանավանդ որ, օլիմպիական խաղերում մրցանակային է համարվում առաջին վեցյակը:
Հաճելի է, որ մեր երկիրը խաղեր է գործուղել երկու մարմնամարզիկ և այդ երկյակը հրաշալի մրցելույթներով բարձր պահեց սպորտային մարմնամարզության հայկական դպրոցի պատիվը:
Շնորհավորում ենք մեր մարզիկներին, մարզիչներին, համապետական ֆեդերացիային և սպորտի պետական ու հասարակական կառույցների ներկայացուցիչներին:
Օլիմպիական մեդալների արահետը բացված է ու լիահույս ենք, որ պատվո պատվանդան կբարձրանան նաև մյուս մարզաձևերի մեր պատվիրակները:
