Արդեն երեք ամիս է անցել  ամառային 33 –րդ մարզահանդեսից և  << Փարիզ - 2024 >>  օլիմպիական խաղերը շատերի համար իսկապես անմոռանալի են:  

Խաղերի ավարտից  հետո Փարիզի քաղաքապետ Անն Իդալգոն ցանկանում էր  քաղաքի խորհրդանիշ  Էյֆելյան աշտարակի վրա թողնել օլիմպիական հինգ գունավոր օղակները՝ մինչև  2028թ.  Լոս Անջելեսում կայանալիք ստուգատեսը:  Սակայն հուշարձանի հեղինակ Գուստավ Էյֆելի հետնորդները չեն համաձայնել և դրանք  արդեն  հանվել են   աշտարակի վրայից:

Հիդալգոյի ցանկությունը պարզ էր, քանզի Փարիզը չի ցանկանում ոհրաժեշտ տալ օլիմպիական տրամադրությանը, քանզի շատ մարդիկ դեռ փորձում են  վերապրել քաղաքի մարզական տրամադրությունը:  

Օլիմպիական օղակների հետ մեկտեղ ապամոնտաժվել են նաև քաղաքի ժամանակավոր մրցավայրերը, անհետացել է նաև Թյուիլերի այգիներում տեղադրված կրակամանը և այլն:

Պաշտոնական տվյալներով  Փարիզի խաղերը խթանել են Ֆրանսիայի տնտեսական աճին, թեև երկրի  կառավարությունը դեռևս  չի բացահայտել ընդհանուր ծախսերը։ Ակնկալվում է, որ հաջորդ ամիս կտրվեն բոլոր գնահատականները:  

<< Փարիզ - 2024 >>  օլիմպիական և պարալիմպիկ խաղերը զգալի ազդեցություն են ունեցել  երկրում սպորտի մասսայականացման  գործում: Մարզական ակումբներում  նկատելի է  այցելուների  թվի զգալի աճը, հատկապես այն մարզաձևերում, որոնցում Ֆրանսիացիները նվաճել են  մեդալներ, ինչպիսիք են՝  սեղանի թենիսը, սուսերամարտը և լողը:

Մինչ մարդիկ պայքարում են նոստալգիայի դեմ, շատերի մոտ  խանդավառություն և ոգևորություն է ներշնչել 2030թ.  26 –րդ ձմեռային օլիմպիական խաղերի անցկացման  փաստը՝ ֆրանսիական Ալպերում: Ի դեպ, այդ մասին որոշումն ընդունվել է այս ամառ, հուլիսի 24-ին, Փարիզում կայացած ՄՕԿ-ի 142-րդ նստաշրջանում։

Հ. Գ. Ֆրանսիայի խորհրդանիշ Էյֆելյան աշտարակի վրա,  խաղերի մեկնարկից 50 օր առաջ, հունիսի 6-ի լույս 7-ի գիշերն է  տեղադրվել օլիմպիական օղակները, որը զարդարել էր   Ֆրանսիայի և Փարիզի հպարտություն Էյֆելը:

29 մետր լայնություն և 13 մետր բարձրություն ունեցող և միմյանց միահյուսված  կոնստրուկցիան   չորս կռունկների ու ավելի քան երեսուն մարդկանց  օգնությամբ հանգրվանել էր  աշտարակի  15 մետր բարձրության վրա: