Հայաստանում մենապայքարային մարզաձևերի զարգացման  և տարածման գործում  անուրանալի ծառայություն ունի երևանցի Լյովա Վարդանյանը: Նա ազատ ըմբշամարտից ԽՍՀՄ սպորտի վարպետ էր, վաստակավոր մարզիչ և աշխատող:

Լյովա Վարդանյանը գործուն սպորտին հրաժեշտ տալուց հետո  մարզիչ է աշխատել և նրա սաները  շարունակաբար համալրել են Հայաստանի հավաքականները:

Իր գործի նվիրյալ մասնագետը  հրավիրվել  է   հայսպորպետկոմ / ներկայիս ԿԳՄՍ /  և ղեկավարել է մենապայքարային մարզաձևերի բաժինը: Նրա գործունեության  տասնամյակների ընթացքում մեր մարզիկները խոսուն հաղթանակներ են տոնել աշխարհի, Եվրոպայի առաջնություններում , օլիմպիական խաղերում  և միջազգային մրցաշարերում: Ավաղ,  արդեն չորս տարի է, որ կյանքին հրաժեշտ է տվել շնորհալի Լյովա Վարդանյանը: Նրա հիշատակը հավերժացնելու նպատակով Երևանում  չորրորդ  անգամ կազմակերպվեց  մինչև 23 տարեկան ազատ ոճի ըմբիշների մասնակցությամբ միջազգային մրցաշար: Ի դեպ,  այդ ստուգատեսը անցկացվեց  այժմ արդեն նախկին << Միկա >> մարզապալատում, որը վերանվանվել է հայեցի  <<  Արաքս >> անունով, ինչպես եղել է տասնամյակներ շարունակ:

Մրցագորգ ելան 11 երկրների ավելին քան 200  ազատ  ոճի  մարզիկներ:

Տանտերերից  առավել հաջող հանդես եկան 61 կգ քաշայինները: Նրանք զբաղեցրին պատվո պատվանդանի բոլոր աստիճանները՝ հետևյալ հաջորդականությամբ. Հարություն Հովհաննիսյան, Էրիկ Հայրիյան և Գագիկ Ղազարյան:  

Մեր ըմբիշներից Րաֆֆի Արտուշյանը / 65 կգ / դարձավ երկրորդ, իսկ Տիգրան Ղազարյանը / 70 կգ /, Ռազմիկ Եփրեմյանը / 86 կգ / և Խաչատուր Խաչատրյանը / 125 կգ /  կանգնեցին պատվանդանի երրորդ աստիճանին: