2026թ. հոկտեմբերի 31-ից նոյեմբերի 13-ը Սենեգալի մայրաքաղաք Դաքարում  կանցկացվեն պատանեկան օլիմպիական ամառային չորրորդ խաղերը:  Այդ կապակցությամբ այնտեղ  տեղի է  ունեցել միջազգային օլիմպիական կոմիտեի համակարգող հանձնաժողովի հերթական  նիստը: Աշխատանքներին մասնակցել են  կառույցի նորընտիր նախագահ Քիրսթի Քովենթրին, ՄՕԿ –ի համապատասխան հանձնաժողովի  ղեկավար Համֆրի Քայանգեն, այլ պատասխանատուներ:

Ընդգծվել է, որ նախապատրաստական աշխատանքները  ճիշտ ուղղությամբ են ընթանում  ու Աֆրիկայում կանցկացվեն բացառիկ խաղեր:

Մեկնարկել է  նաև  «Դաքարի ակադեմիա  - 2026» կրթական նախաձեռնությունը, որի  շրջանակներում նախատեսվում է պատրաստել 21- 35 տարեկան  շուրջ  400 մասնագետ՝ կազմկոմիտեում աշխատելու համար: Նրանք  կծանոթանան  սպորտի  կառավարման և մրցումների կազմակերպման հիմնական հմտություններին։

Հաստատվել է նաև օլիմպիական մրցավայրերի ցանկը. Դաքարի  տարբեր մարզադաշտերում կանցկացվեն լողի, 3x3 բասկետբոլի, բրեյք - դանսի, բեյսբոլի, սքեյթբորդինգի, ռեգբի յոթնյակի, աթլետիկայի, բռնցքամարտի, մինի ֆուտբոլի, ծանրամարտի, թենիսի, կարատեի, հրաձգության, սյորֆինգի, ժայռամագլցման, մականախաղի, գոլֆի, ժամանակակից հնգամարտի և կանոեի մրցաշարերը։ Խճուղային հեծանվավազքը նույնպես կմեկնարկի  և կավարտվի  քաղաքի պատմական հատվածում։

Դիամնյադիո արվարձանում  կգործեն  մարզիկների գյուղը, ինչպես նաև  ձիասպորտի, նետաձգության, բադմինտոնի, մինի ֆուտբոլի, սուսերամարտի, թաեքվոնդոյի, սեղանի թենիսի, ուշուի, գեղարվեստական մարմնամարզության և ձյուդոյի մրցասպարեզները:

Սալի քաղաքում  նախատեսված են վինդսյորֆինգի, ափամերձ թիավարության, լողափնյա վոլեյբոլի, լողափնյա հանդբոլի, լողափնյա ըմբշամարտի և եռամարտի մրցաշարերը։