«Դաքար – 2026 » պատանեկան օլիմպիական խաղերի մեկնարկին մնացել է 500 օր: Այն կանցկացվի  եկող մրցաշրջանի հոկտեմբերի 31 –ից ՝ նոյեմբերի 13 –ը:

Նշենք, որ մրցաշարը  նախատեսված էր կազմակերպել 2022թ.,  սակայն կորոնավիրուսի համավարակի   պատճառով միջոցառումը հետաձգվեց չորս տարով:

Այդ մարզահանդեսը   չորրորդ  օլիմպիական պատանեկանն է՝  ութ տարվա ընթացքում:  Նախորդը անցկացվել է 2018թ.՝ Բուենոս Այրեսում։ Ստուգատեսը  նաև առաջին խոշոր միջոցառումը կլինի,  որը կանցկացվի ՄՕԿ-ի նոր նախագահ Քիրստի Քովենթրիի օրոք։

Կանխատեսվում է, որ Սենեգալի մայրաքաղաքում կհավաքվեն 2700 մարզիկ - մարզուհիներ։ Մրցումների ծրագիրը զգալիորեն փոխվել է:  25 մարզաձևեր  են  ներկայացված  մրցումների ծրագրում. աթլետիկա, լող, նետաձգություն, բադմինտոն, բեյսբոլ, բասկետբոլ (3x3), բռնցքամարտ, բրեյք –դանս, խճուղային հեծանվավազք, ձիասպորտ, սուսերամարտ, ֆուտբոլ, սպորտային մարմնամարզություն, լողափնյա հանդբոլ, ձյուդո, թիավարություն, ռեգբի – 7,  առագաստանավային  սպորտ, սքեյթբորդինգ, սեղանի թենիս, թաեքվոնդո, եռամարտ, լողափնյա  վոլեյբոլ, լողափնյա ըմբշամարտ և ուշու:  

Օլիմպիական կառույցների պատրաստվածության մակարդակը գնահատվում է բարձր։ Աշխատանքները ընթանում  են տարբեր տեխնոլոգիաների ներդրման և երկրպագուների համար ծառայությունների կազմակերպման ուղղությամբ, ներառյալ` տոմսերի վաճառքի համակարգը և անվտանգության կազմակերպումը։

Միջոցառման  կարգախոսն է «Աֆրիկան ողջունում է, իսկ Դաքարը՝  տոնում »: