Գյումրիում այս օրերին ուսումնամարզական հավաք են անցկացնում  Հայաստանի ծանրամարտի  աղջիկների  և տղաների պատանեկան հավաքականները:

Վաստակավոր մարզիչ  Արտաշես Ներսիսյանի գլխավորած աղջիկների թիմը հունիսի 28 –ին կավարտի մարզումները: Դրանից մեկ շաբաթ հետո, ստույգ ՝ հուլիսի յոթից,  նրանք  հերթական հավաքը կսկսեն մայրաքաղաքի Օլիմպավանում: Այդ փուլում նպատակ կա հղկել աղջիկների ընդհանուր պատրաստականությունը, բարելավել մարզավիճակը, որպեսզի հաջողության հասնեն Մադրիդում հուլիսի 23 –ին մեկնարկելիք Եվրոպայի առաջնությունում: Մարզիչը ծրագրել է ծանրահարթակ ուղեկցել չորս մարզուհու:

Սպորտի օրենքներով մարզումային և մրցումային աշխատանքները շարունակական են: Մադրիդյան մրցումների մասնակիցները  պարապմունքները կշարունակեն ավագ թիմակցուհիների հետ:

Հայաստանի կանանց գլխավոր թիմը Նորվեգիայի Ֆորդե քաղաքում հանդես կգա  հոկտեմբերի երկուսին մեկնարկելիք աշխարհի, իսկ երիտասարդականը՝ հոկտեմբերի 28 –ին Ալբանիայի Տիրանայում՝  մինչև 20 և մինչև 23 տարեկանների Եվրոպայի առաջնություններում:

Գյումրիի  << Օլիմպիիկ >> համալիրում արդեն հինգ օր է, ինչ հավաք է սկսել մեր երկրի պատանեկան թիմը: Անցյալի նշանավոր ծանրորդ Երվանդ Կիրակոսյանի ղեկավարությամբ տղաները  մասնակցում են  նպատակային մարզումներին: Կհաջորդի Երևանի Օլիմպավանում նախատեսված  հերթական փուլը: Լուրջ խնդիր է  դրված պարապող ությակի առջև. պետք է հնարավորինս լավ հանդես գալ  նույն Մադրիդում նշանակված Եվրոպայի պատանեկան ստուգատեսում: