Դեկտեմբերի 21-ը նշվում է որպես բասկետբոլի համաշխարհային օր: Այն պաշտոնապես սահմանվել է ՄԱԿ-ի Գլխավոր ասամբլեայի 2023 թվականի օգոստոսին ընդունված բանաձևով:

Ամսաթիվը ընտրվել է ի հիշատակ բասկետբոլի  առաջին պաշտոնական խաղի անցկացման օրվան, որը տեղի է ունեցել 1891թ.  դեկտեմբերի 21-ին, ԱՄՆ Մասաչուսեթս նահանգի Սփրինգֆիլդ քաղաքում:  

Բասկետբոլը աշխարհում ամենատարածված մարզաձևերից մեկն է:  Առնվազն 450 միլիոն մարդ է զբաղվում այդ մարզաձևով։ 1936թ. այն  ներառված է օլիմպիական խաղերի ցանկում։ Տղամարդկանց  աշխարհի առաջնությունները պարբերաբար անցկացվում են 1950, կանանցը՝ 1953, իսկ Եվրոպայի առաջնությունները՝ 1935 թվականներից:

Հայաստանում  նույնպես գործում է մարզաձևի  Ֆեդերացիա, որը ՖԻԲԱ Եվրոպայի անդամ է:

Մեզանում  մարզաձևը սկսել է գործել 1920 –ականներից: Մեր թիմերը, հավաքականները մասնակցել են տարբեր մրցաշարերի: Եղել են նաև անհաջողություններ: Բայց վերջին 10 - 15 տարիներին վերելքի նոր  ուղի է  բռնել հայկական բասկետբոլը:

Տարիքային տարբեր խմբերի  հավաքականները մասնակցում են նաև միջազգային մրցումների, որի արդյունքում աճել է մարզիկ – մարզուհիների վարպետությունը, հարստացել նրանց մրցափորձը:

Հայաստանի բասկետբոլի ֆեդերացիան /նախագահ ՝ Հրաչյա Ռոստոմյան/ ամեն բան անում է մարզաձևը բարձր մակարդակի հասցնելու  և մասսայականություն ապահովելու համար:

Ասածն է վկայում այն, որ Հայաստանի բասկետբոլի ֆեդերացիան արդեն պաշտոնապես հայտ է ներկայացրել 2026թ. Եվրոպայի առաջնություններին մասնակցելու համար ՝ տարիքային բոլոր խմբերի հավաքականներով:

Մարզաձևի համաշխարհային օրվա կապակցությամբ շնորհավորում ենք բնագավառի մարդկանց , ՀՀ ֆեդերացիային, մարզիկներին, երկրպագուներին և բոլոր նրանց, ովքեր առնչված են բասկետբոլի հետ: