Միլանը  ձմեռային  համաշխարհային մարզահանդեսի մեկնարկից առաջ տոգորված է օլիմպիական ոգով և այն ներթափանցել է Իտալիայի մարդկանց սրտերը: Այս մասին Միլանի Լա Սկալայում, ՄՕԿ –ի  145-րդ նստաշրջանի բացման արարողության ժամանակ,  ասել է  կազմակերպության նախագահ  Քիրստի Քովենթրին:

«Լա Սկալան մարմնավորում է իտալական ոգին, ժողովրդի  սերը արվեստի և կյանքի, ստեղծագործության և նորարարության նկատմամբ: Շնորհակալություն  Իտալիայի ղեկավարությանը, երկրի ԱՕԿ –ին և բոլոր նրանց, ովքեր իրենց ներդրումն են ունեցել:

Շնորհակալություն մեր բարեհամբույր իտալացի հյուրընկալողներին՝ այս հիասքանչ վայրում՝ Լա Սկալայում, ջերմորեն ընդունելու համար։ Այս բեմից արվեստագետների, օպերային երգիչների և երաժիշտների սերունդները ոգեշնչել են հանդիսատեսին՝ բարձր արվեստի գերազանցության, գեղեցկության և հույզերի միջոցով»։

Քովենթրին իր ելույթն ավարտել  է  իտալերենով.  «grazie Italia, / շնորհակալություն, Իտալիա /»:

Իտալիայի նախագահ Սերջիո Մատարելան իր ելույթում   զինադադարի կոչ է արել  կայանալիք օլիմպիական  խաղերի ժամանակ:

Միջոցառմանը  մասնակցել  են ՄՕԿ-ի պատվավոր նախագահ Թոմաս Բախը, ՄՕԿ  -ի անդամներն ու պատվավոր անդամները, Իտալիայի ԱՕԿ –ի  նախագահ Լուչիանո Բուոնֆիլիոն, Միլան Կորտինա 2026-ի կազմկոմիտեի նախագահ Ջովաննի Մալագոն և հյուրընկալող տարածաշրջանների ու քաղաքների ներկայացուցիչները։

Միլանը նստաշրջանի բացման համար շքեղ ընդունելություն է  կազմակերպել։ Երեկոն նվիրված է եղել երկրի մշակույթին, իսկ Լա Սկալայի հայտնի  ղեկավար Ռիկարդո Շայլին ներկայացրել է  երաժշտական ծրագիր՝ նվիրված իտալական օպերայի երկու հսկաներին՝ Ջոակինո Ռոսսինիին և Ջուզեպպե Վերդիին։