ԱՆՎԱՆԻ ՎԱՐՊԵՏԻ ՀՈՒՇԱՄՐՑԱՇԱՐՈՒՄ
Լիտվայի Կաունաս քաղաքում անցկացվեց ԽՍՀՄ բռնցքամարտի անվանի վարպետ, գերծանրքաշային Ալգիրդաս Շոցիկասի միջազգային ավանդական հուշամրցաշարը:
Կաշվե ձեռնոցի կաունասցի այդ վարպետը հրաշալի գիտեր Հայաստանը և հայ մարզիկներին: Նրա հիմնական մրցակիցներից մեկը եղել է թբիլիսցի մեր հայրենակից Անդրո Նավասարդյանը:
Գործուն սպորտին հրաժեշտ տալուց հետո Շոցիկասը մարզել է իր հայրենակացներին, ղեկավարել է Լիտվայի հավաքականը, որին բազմիցս ուղեկցել է Ծաղկաձոր՝ ուսումնամարզական հավաքների:
Անդրադառնալով կաունասյան ստուգատեսին, ասենք, որ 13 երկրների ներկայացուցիչների թվում են եղել նաև Հայաստանի պատվիրակները: Նրանցից՝ Ռուսլան Ասլիկյանը / 55 կգ /, Արթուր Մկրտչյանը / 65 կգ / և Դավիթ Սիմոնյանը / 90 կգ / արժանացել են հաղթողի կոչմանը: Վերջինը ճանաչվել է նաև մրցաշարի լավագույն բռնցքամարտիկ:
