Դեկտեմբերի 15-ին Կատովիցեում (Լեհաստան) անցկացվեց կայծակնային շախմատի Եվրոպայի առաջնությունը (11 տուր, 22-ական հանդիպում), որին մասնակցեց 1091 շախմատիստ, այդ թվում 72 գրոսմայստեր:

Հայաստանը ներկայացնող գրոսմայստեր Զավեն Անդրիասյանը, 22 հնարավորից վաստակելով 16 միավոր, զբաղեցրեց 14-րդ տեղը: Մեր շախմատիստը մրցաշարի առաջին համարն էր:

Եվրոպայի չեմպիոն դարձավ Սերգեյ Ժիգալկոն (Բելառուս)՝ 18 միավոր: Երկրորդ տեղում է Լյուկ Մակշեյնը (Անգլիա), երրորդում՝ Պետեր Միխալիկը (Չեխիա)՝ 17.5-ական միավոր:

Դեկտեմբերի 16-ին եւ 17-ին Կատովիցեում կանցկացվի արագ շախմատի Եվրոպայի առաջնությունը, որտեղ հանդես կգա 1187 շախմատիստ: Այս մրցաշարում Զավեն Անդրիասյանը վարկանիշով 25-րդն է:

Մրցաշարը կանցկացվի 11 տուրով, որից վեցը կխաղացվի այսօր:

Լուսանկարը՝ մրցաշարի պաշտոնական կայքի