Ամռանը Բելառուսի մայրաքաղաքում անցկացվելիք եվրոպական  մարզական երկրորդ խաղերի կազմկոմիտեում ենթադրում են, որ Մինսկ կայցելի 70 հազար զբոսաշրջիկ: Մրցումների ընթացքին կհետևի 50 հազար արտասահմանցի, 18 հազար պաշտոնական անձ: Եթե կանխատատեսումներն արդարանան, ապա մրցավայրերի տրբունաներում ազատ նստելատեղ չի լինի:

Օլիմպիական ավանում ապրողները անվճար կստանան անհրաժեշտ բոլոր դեղամիջոցները, իսկ մարզակառույցներում և մարզավանում  առանձին կգործեն համաբուժարաններ:

Խաղերի ընթացքին կհետևեն նաև համաշխարհային հակադոպինգային գործակալության անկախ դիտորդները: Դոպինգ սպաները յուրաքանչյուր չորրորդ մասնակցից կվերցնեն համապատասխան նմուշ:

Եվրոպական 50 երկրի 4 հազար մարզիկ – մարզուհի կպայքարի մեդալների 199 հավաքածուի համար, իսկ խաղերի ծրագրում ընդգրկված 15 մարզաձևից իննում կվիճարկվի Տոկիոյի օլիմպիական խաղերի ուղեգիր:

Հայաստանից Մինսկի խաղերին մասնակցելու իրավունքը առաջինը ստացել է կանոէ մրցաձևի երկու ներկայացուցիչ: Մարզիկների անունները ավելի ուշ կորոշի թիավարության  հանրապետական ֆեդերացիայի կանոէ մրցաձևի մարզչական խորհուրդը: Բելառուսական ստուգատեսի վարկանիշային մրցաշարերը կշարունակվեն մինչև  2019թ. ապրիլի 14-ը:

Խաղերը տեղի կունենան 2019թ. հունիսի 21 – 30 –ը:

ՀԱՕԿ լրատվական բաժին