Ըմբշամարտի Եվրոպայի Մ-23 առաջնություն. Մարզչական ամփոփում

14:20 - 13 Մար, 2019

Ազատ ոճի ըմբշամարտի Հայաստանի ազգային հավաքականի գլխավոր մարզիչ Հաբեթնակ Կուրղինյանը եւ հունահռոմեական ըմբշամարտի Հայաստանի երիտասարդական թիմի ավագ մարզիչ Արմեն Բաբալարյանը լրագրողների հետ հանդիպմանն ամփոփեցին Սերբիայի Նովի Սադ քաղաքում անցկացված Եվրոպայի մինչեւ 23 տարեկանների առաջնությունը: 

Հաբեթնակ Կուրղինյան. «Ցանկանում եմ շնորհակալություն հայտնել, որ այսպիսի միջոցառումները դառնում են ավանդույթ, եւ ամեն մրցաշարից հետո մենք արժանանում ենք լրագրողների ուշադրությանը:

Վազգեն Թեւանյանը եւ Խաչատուր Պապիկյանը դարձան մեդալակիրներ, իսկ մյուսների մասին կասեմ, որ բոլորն էլ երիտասարդ ըմբիշներ են, ունեն ներուժ ու հնարավորություն: Նրանք պարտվեցին հավասար գոտեմարտերում, եւ դա ունի ուղղումների ու աշխատելու կարիք: Կարող ենք հասնել նրան, որ հաջորդ մրցաշարերում նրանք եւս պայքարեն մեդալների համար:

Կհանգստանանք մի քանի օր, իսկ հետո կանցկացնենք հավաք եւ կպատրաստվենք մեծահասակների Եվրոպայի առաջնությանը: Մրցումները ցույց կտան, թե ինչ ակնկալիքներ ունենք Եվրոպայի առաջնությունից: Ցանկացած մրցաշարում թե՛ մարզիչները, թե՛ մարզիկներն ակնկալում են հաղթանակ: Ցանկալի է, որ մեդալները շատ լինեն, որպեսզի բոլորիս համար լավ լինի:

Արդեն ասել եմ, որ մեծահասակների հավաքականում տեղի է ունենում սերնդափոխություն, ինչը ցույց տվեց նաեւ Հայաստանի առաջնությունը: Երիտասարդների թիմից մեծահասակների մակարդակ անցումը բարդ է, բայց լուրջ աշխատանքներ են տարվում այդ ուղղությամբ:

Շատ եմ կարեւորում, որ քաշային կարգում կա մրցակցություն: Շատ ուրախ կլինեի, որ մյուս քաշային կարգերում եւս լիներ այնպիսի մրցակցություն, ինչպիսին 65 կգ քաշային կարգում է: Դրա համար մենք ունենք մրցումներ: Բոլորը կստանան հնարավորություն: Ով կհաղթի մրցումներում, նա էլ կընդգրկվի թիմում: Ես չեմ միջամտում, չեմ գերադասում կամ թերագնահատում որեւէ մարզիկի: Ով հաղթի, նա էլ կմեկնի»:

Արմեն Բաբալարյան. «Սլավիկ Գալստյանը նվաճեց արծաթե մեդալ, բայց նա, բնականաբար, պետք է հաղթեր: Ինչու եմ ասում՝ պետք է հաղթեր, քանի որ նա վրացի ըմբիշին աշխարհի առաջնությունում հաղթել էր 10:0 հաշվով: Երեւի, նրա միակ թերությունը հոգեբանական էր: Կարծում եմ՝ նա շտապեց, քանի որ ցանկանում էր ավելի շուտ հաղթել ու ավելի բարձր միավորներով: Նա հաղթում էր 8:4 հաշվով, սակայն վերջին րոպեի ընթացքում մի քիչ թուլություն ցուցադրեց եւ պարտվեց վրացի ըմբիշին:

Մրցավարների մասին կասեմ, որ նորմալ մրցավարություն էր՝ առանց կողմնապահության: Կարելի է ասել, որ մեր տղաներն են մեղավոր իրենց պարտություններում:

Մարզչական շտաբի կողմից նկատվեց մարզիկների թերությունները եւ առավելությունները: Հասկանալի դարձավ, թե մրցաշարերից առաջ մարզիկների հետ ինչ անհատական աշխատանքներ պետք է կատարվի՝ մեծահասակների մակարդակ տեղափոխվելու համար: Մեր մարզիչների գիտելիքներն այնքան բարձր մակարդակի վրա են, որ կշարունակենք աշխատել հաջորդ մրցաշրջաններում մեր երկրպագուներին ուրախացնելու համար»:

Հիշեցնենք, որ հունահռոմեական ըմբշամարտի Հայաստանի երիտասարդական հավաքականը մեկ արծաթե մեդալով էր ավարտել ելույթը Եվրոպայի Մ-23 առաջնությունում, որին մասնակցեց 5 ըմբիշով: Արմեն Բաբալարյանի գլխավորած թիմի կազմում Եվրոպայի փոխչեմպիոն էր դարձել 63 կգ քաշային Սլավիկ Գալստյանը: Հայաստանի մյուս ներկայացուցիչներից Նորայր Հախոյանը (55 կգ), Արմեն Մելիքյանը (60 կգ), Հրանտ Կալաչյանը (72 կգ) եւ Դավիթ Օվասապյանը (130 կգ) հաջողության չէին հասել:

Ազատ ոճի ըմբշամարտի Հայաստանի Մ-23 հավաքականը Հաբեթնակ Կուրղինյանի գլխավորությամբ նվաճել էր մեկական ոսկե եւ բրոնզե մեդալներ: Եվրոպայի Մ-23 չեմպիոնի կոչումը նվաճել էր Վազգեն Թեւանյանը (65 կգ), իսկ Խաչատուր Պապիկյանը (74 կգ) դարձել էր բրոնզե մեդալակիր: Վաղինակ Մաթեւոյանը (57 կգ), Հրաչյա Մարգարյանը (61 կգ), Գեւորգ Մխեյանը (70 կգ), Հովհաննես Մխիթարյանը (86 կգ) եւ Սարգիս Հովսեփյանը (92 կգ) մեդալ չէին նվաճել:

Այլ նորություններ