Ղազախստանի Ակտուա քաղաքում տեղի ձյուդոիստների հետ 14 –օրյա համատեղ մարզումներ անցկացնելուց հետո Հայաստան վերադարձավ մարզաձևի մեր հավաքականը: Գլխավոր մարզիչ, մոտ անցյալի նշանավոր մարզիկ, գյումրեցի Հովհաննես Դավթյանը հայտնեց, որ  միջոցառումը լիովին ծառայեց նպատակին: Մեր 13 տղաների գերակշիռ մասը մրցափորձի պակաս ունի: Այն ինչ որ չափով  հարստացնելու համար պարապմունքները հագեցած էին գոտեմարտերով: Ընթացիկ մրցաշրջանում, սա, կարելի է ասել, հավաքականի լիարժեք կազմով առաջին մրցուղերթն էր:

Մարտի 3 – ին  թիմը կհանգրվանի Ծաղկաձորում: Դա առաջիկա մրցումների համար նախապատրաստական առաջին փուլը կհամարվի, որովհետև շեշտը կդրվի տղաների ընդհանուր ֆիզպատրաստականությունը բարելավելու վրա: Իհարկե, չեն մոռացվի  տեխնիկատակտիկական հարցերում եղած թերությունները շտկող անհատական մարզումները: Կհաջորդեն  մեր թիմի մրցուղերթները ` Եկատերինբուրգում , Թբիլիսիում և  Անթալիայում կայանալիք օլիմպիական վարկանիշային մրցաշարերը: Այդ ընթացքում ձյուդոյի հարուստ ավանդույթներ ունեցող  Վրաստանի  և Ռուսաստանի Դաշնության թիմերի հետ համատեղ մարզումներ կանցկացվեն: Ամենօրյա պարապմունքներն ու գոտեմարտերը բավականին կհարստացնեն մեր տղաների տեխնիկական հնարքների զինանոցը, մարտավարման տակտիկան և մրցափորձը:

Վարկանիշային է նաև Չեխիայի մայրաքաղաք Պրահայում մայիսի 1 -3 –ը անցկացվելիք Եվրոպայի առաջնությունը: