Կանոէի միջազգային ֆեդերացիան  / ICF/ փոփոխություն է մտցրել կազմակերպական հարցերում: Նախկինում մարզիկները մրցավայր էին մեկնում նավակներով: Հետայսու ամենուրեք կազմակերպիչները նոր նավակներ կտրամադրեն մասնակիցներին:

Որոշումը  կնպաստի մարզաձևի մասսայականացմանը  և նոր մրցավայրերի ստեղծման գործին:  Այս համակարգի շնորհիվ պատվիրակությունները կազատվեն ծանրաբեռնվածությունից և ավելի հեշտ կլինի մրցումների մեկնել – վերադառնալու գործընթացը:

Այդպես կլինի նաև Բառնաուլում, որտեղ  վաղը ՝ մայիսի 20 –ին կմեկնարկի մարզաձևի աշխարհի գավաթի խաղարկության երկրորդ փուլի մրցաշարը:

Կազմկոմիտեն բառնաուլյան ստուգատեսի մասնակիցներին արդեն  300 նոր նավակներ է տրամադրել , որի համար ծախսել է ռուսական 150 միլիոն ռուբլի:

Մրցաշարին  հայտավորված են 57 երկրների  ավելի քան 400 մարզիկներ: Նրանց թվում են  մեր երկրի պատվիրակներ, կանոիստ   Արա Վիրաբյանը և  բայդարկավար  Էդգար Թությանը:  

Մրցումներում կխաղարկվեն օլիմպիական ուղեգրեր: