Մեր  երկրում  խճուղային հեծանվավազքի խմբեր են գործում  Երևանում ,Վանաձորում և Մասիսում: Կան նաև տարիքային տարբեր խմբերի հավաքականներ, որոնք նախապատրաստվում են Եվրոպայի , աշխարհի առաջնություններին: Դրանք կանցկացվեն համապատասխանաբար Պորտուգալիայի Անադիա քաղաքում ՝ հուլիսին, Իսրայելի Թել Ավիվում ՝ օգոստոսին : 

Հեծանվորդները կարևորում են նաև Սլովակիայի Բանկա Բիստրիցա քաղաքում հուլիսի 24 – 29 –ը անցկացվելիք Եվրոպայի օլիմպիական երիտասարդական ամառային փառատոնը:

Ստուգատեսներում  հաջողության հասնելու նպատակով   հեծանվորդները մարզիչների ղեկավարությամբ պարապմունքներում տասնյակ կիլոմետրեր են հաղթահարում: Նրանց  խմբերին կարելի է տեսնել Երևանից  Էջմիածին, Արմավիր,  Արտաշատ, Արարատ , Երասխ ձգվող մայրուղիներում:  Արտաշատից վերադարձող  մի խմբի ակամա ուղեկցող հանդիսացանք:  Նրանց հետ պարապմունքը   << ավարտեցինք  >> ԿԳՄՍ նախարարության օլիմպիական հերթափոխի մարզադպրոցում:  Տնօրեն, վաստակավոր մարզիչ Արմեն Գյոզալյանը  հետևում էր  << երկաթե նժույգներ >>  հեծած պատանիների գործողություններին:  Նրանք առաջին քայլերն էին կատարում  200 մետր պարագծով  ասֆալտապատ հատվածում:  Իմացանք, որ ավանդույթներով հարուստ այդ մարզօջախի խմբերում ընդգրկված են տարբեր տարիքի 241 սաներ: Բազմափորձ տնօրենն ասաց, որ բնածին օժտվածներ կան, մնում է, որ նրանց կարողանան   դարձնել միջազգային մակարդակի վարպետներ . . .