ՎԵՑԵՐՈՐԴ ՀՈՒՇԱՄՐՑԱՇԱՐՈՒՄ

11:37 - 07 Հուն, 2022

Մեզանում  աթլետիկայի  տարածման գործում անուրանալի է Լիպարիտ և Մանվել  Մալոյան եղբայրների ներդրումը: Նրանց հիշատակը հավերժացնելու նպատակ է հետապնդում  Կապանի  համայնքապետարանի  և Սյունիքի մարզի աթլետիկայի ֆեդերացիայի նախաձեռնությամբ անցկացվող ամենամյա հուշամրցաշարը:

Թվով վեցերորդ միջոցառմանը մասնակցեցին  մայրաքաղաքի, Գյումրիի, Արտաշատի, Արցախի, Քաջարանի և տեղի մարզադպրոցների 37 մարզիկ – մարզուհիներ: Նրանք բոլորը ցատկորդներ են ու հանդես եկան հեռացատկ և եռացատկ մրցաձևերում:

Մարզի աթլետիկայի ֆեդերացիայի նախագահ, ՀՀ ֆիզկուլտուրայի և սպորտի պատվավոր աշխատող Արշամ Սարգսյանը  զրույցում ասաց, որ կանանց պայքարում առավել հաջող հանդես եկավ կապանցի Յանա Սարգսյանը: Նա հեռացատկեց 6մ. 27 սմ.  , եռացատկեց 13մ. 33սմ. , երկու դեպքում էլ սահմանեց հուշամրցաշարի ռեկորդ և գրավեց առաջին տեղը:

Տղամարդկանց հեռացատկում 7մ.  52 սմ. արդյունքով  լավագույնը երևանցի   Արտակ Համբարձումյանն էր, իսկ եռացատկում  15մ. 18 սմ. ցուցանիշով՝ արտաշատցի Գոռ Հովակիմյանը:

Կազմակերպիչները բոլոր մասնակիցներին նվերներ հանձնեցին, իսկ հաղթողներն ու մրցանակակիրները ստացան նաև հավաստագրեր և մեդալներ:

Նշենք նաև, որ բոլոր ծախսերը հոգացել  էր Կապան համայնքի ղեկավար Գևորգ Փարսյանը:

 

Այլ նորություններ