Իտալիայում անցկացված բռնցքամարտի Եվրոպայի պատանեկան առաջնությունը վկայեց , որ մեզանում մարզաձևը հուսալի հերթափոխ ունի: Նկատի ունենք այն, որ մեր թիմի ավագ մարզիչ, վասատակավոր մարզիչ Աշիկ Գրիգորյանի սաներից հինգը դարձան մրցանակակիր:

Իրենց բոլոր մրցակիցներին հաղթեցին և առաջին տեղը գրավեցին  էջմիածինցի Վաղարշակ Քեյանը /  46 կգ /  և արցախցի Էրիկ Առստամյանը / 52 կգ /:  

70 կգ քաշային կարգում առաջինի կոչմանն  արժանանալու իրական հավակնորդ էր գյումրեցի Երանոս Օհանյանը: / Նա, ի դեպ, անցյալի մեր նշանավոր բարձրքաշային Բագրատ Օհանյանի եղբորորդին է /: Նա նույնպես եզրափակիչում հանդես գալու իրավունք էր նվաճել: Բայց մրցաշարի բուժանձնակազմը վնասվածքի պատճառով նրան զրկեց մրցելու հնարավորությունից  և Երանոսը բավարարվեց արծաթե պարգևով:

Պատվանդանի երրորդ աստիճանին կանգնեցին վանաձորցի Դավիթ Սաֆարյանը / 50 կգ / և էջմիածինցի Ռաֆայել Ներսիսյանը / 60 կգ /:

Թիմային պայքարում մեր տղաները գրավեցին պատվավոր առաջին տեղը: