ՊԱՏՄԱԿԱՆ ՓՈՓՈԽՈՒԹՅՈՒՆ

12:37 - 10 Մայ, 2023

Ժամանակակից հնգամարտի միությունը (UIPM) և խոչընդոտավազքի  միջազգային ֆեդերացիան (World Obstacle) հայտարարել են համագործակցության մասին:

2021թ. նոյեմբերին UIPM-ը հայտնել էր, որ 2024թ.  Փարիզում կայանալիք օլիմպիական խաղերից հետո  ժամանակակից հնգամարտի  ծրագրից հանվելու է ձիասպորտի արգելացատկը, որին կփոխարինի  արգելքների հաղթահարման մրցումը:

Ինչպես հայտնի է,  ժամանակակից հնգամարտը ներառում է ևս չորս մարզաձև՝ սուսերամարտ, հրաձգություն, կրոսավազք և լող։

Եվ ահա UIPM-ը և World Obstacle-ը որոշել են  վերաորակավորել երկու խոշոր միջազգային արգելքների հաղթահարման  մրցաշարերը՝ իրենց անվանումներում օգտագործելով  միջազգային երկու  ֆեդերացիաների հապավումները: 

Հայտարարության մեջ ասվում է, որ այս պատմական փոփոխությունը թույլ է տալիս աշխարհի տարբեր երկրների խոչընդոտները հաղթահարողներին իրականացնել իրենց օլիմպիական երազանքը: Այն նաև կվերափոխի ժամանակակից հնգամարտը՝ ստեղծելով ներուժ՝  հրապուրելու  շուրջ  մեկ միլիարդ մարդկանց, ովքեր դիտում են խոչընդոտների ասպարեզին առնչվող հանրահայտ հեռուստաշոուները:

UIPM-ը ժամանակակից հնգամարտի հովանավորն է  1948 թվականից: Մարզաձևը օլիմպիական ծրագրում ընդգրկվել է 1912 թվականից։ 

World Obstacle-ը շահույթ չհետապնդող շվեյցարական  անկախ միջազգային սպորտային կազմակերպություն է, որն ամբողջ աշխարհում անցկացնում է «American Ninja Warrior» մարզաշոուներ: Ամերիկյան այս ներկայացումը ճապոնականի ադապտացիան է: 

Ձիասպորտը ժամանակակից հնգամարտի ծրագրից բացառելու հարցը ծագել է 2020թ. Տոկիոյի Օլիմպիական խաղերում տեղի ունեցած սկանդալից հետո։ Կանանց մրցումների ժամանակ գերմանացի մարզիչ Կիմ Ռայսները բռունցքով մի քանի  հարված է հասցրել Saint Boy անունով ձիուն, որի հեծյալն է եղել  հնգամարտիկ Աննիկա Շլոեն։ UIPM-ի գործկոմը  Ռայսներին սև քարտ է տվել, ինչը նշանակում է որակազրկում:

Ավելի ուշ UIPM-ը որակազրկել  և հեռացրել է  Ռայսներին ՝ օլիմպիական խաղերում  կենդանիների նկատմամբ դրսևորած դաժան վերաբերմունքի համար: 

Այլ նորություններ