Երևանում անցկացվեց ՀՀ սուսերամարտի առաջնությունը: Մարտուղյակներում սուսերները խաչաձևեցին 80 մարզիկ – մարզուհիներ:

Խոցասուսերակիրների հավաքականի գլխավոր մարզիչ Արմեն Նավասարդյանը  մեզ հետ զրույցում  ասաց, որ մասնակիցների պատրաստականությունը գոհացրեց: Ասածը վերաբերում է նաև ճկասուսեր և թրասուսեր զենքաձևերի ներկայացուցիչներին: Մեր ներքին մրցաշարերը ավելի դիտարժան են դառնում, իսկ այն, որ թրասուսեր զենքաձևում  առաջին, երկրորդ և երրորդը ճանաչված երկյակի անդամները գյումրեցիներ են , նշանակում է , որ գոհացնող վարպետությունից բացի,  մարզաձևի աշխարհագրությունը նույնպես ուրախացնում է:

Ընթացիկ մրցաշարջանում  հինգ մարզիկներ լրացրին սպորտի վարպետի նորման, որը նույնպես  վկայում է, որ սուսերամարտի հիմքերը մեզանում ամրապնդվում  են: Սա հույս է ներշնչում, որ կվերականգնվեն նաև   երբեմնի բարի ավանդույթները:

Հավատանք, որ մարզչի ցանկությունը իրականություն կդառնա և երկրի պատվասեր մասնագետների սաները հաջողության կհասնեն միջազգային ասպարեզներում,  թեկուզև ՝  առաջիկայում կայանալիք Եվրոպայի ամառային երրորդ խաղերում / Լեհաստանում /:

ՀՀ չեմպիոնի պատվին արժանացան խոցասուսերակիրներ Գրիգոր Մնացականյանը, Էմմա Պողոսովան, ճկասուսերակիրներ Բորիս Դադայանը, Ասյա Մնոյանը և թրասուսերակիր Արմեն Ղալաչյանը: