<< Փարիզ – 2024 >> -ի կազմակերպիչները Սենա գետի երկայնքով օլիմպիական խաղերի փորձնական բացման արարողություն են անցկացրել: 39 նավակների խումբը  ծածկել է Սենայի վեց կիլոմետրանոց երթուղին:

Ֆրանսիայի մայրաքաղաքում օլիմպիական խաղերն առաջինն է լինելու, որ բացման արարողությունը տեղի է ունենալու  մարզադաշտից դուրս։ 

«Մենք իմացանք, որ դա տեխնիկապես իրագործելի է»,-  ասել է կազմկոմիտեի  նախագահ Թոնի Էստանգուն: Օիմպիական եռակի չեմպիոնի խոսքով՝ փորձարկվել է յուրաքանչյուր նավակի համար պահանջվող ժամանակը և շարժիչներին առնչվող  խնդիրների հնարավոր լուծումները:

Պատվիրակությունների փորձնական  նավակներին ուղեկցել է փրկարար ծառայության 18 նավակ, կազմակերպիչներն ու  հեռուստաընկերությունները։ 

Կազմակերպիչներին  մտահոգում  են անվտանգության հարցերը: Հիշենք, որ խաղերի բացման արարողությանը ներկա կլինի  շուրջ  500,000 հանդիսական: Իսկ գետում կլինի 140- 170 նավ՝  10 000 մարզիկների տեղափոխման համար։ 

33 –րդ ամառային օլիմպիական մարզահանդեսի բացման արարողությունը նշանակված է հաջորդ տարվա հուլիսի 26-ին: